గోదావరి పుష్కరాలకు ముందే భద్రాద్రి దేవస్థాన అభివృద్ధి పనులు పూర్తి చేస్తాం

బాసర నుంచి భద్రాద్రి వరకు టెంపుల్ రూట్ కావాలనే లక్ష్యంతో భద్రాచల దేవస్థానాన్ని మహాద్భుతంగా అభివృద్ధి చేయాలనే ఉద్దేశంతో గత శ్రీరామ నవమి రోజున రాష్ట్ర ముఖ్యమంత్రి రేవంత్ రెడ్డి శ్రీకారం చుట్టారని గుర్తు చేశారు. ఇప్పటికే తాను మూడుసార్లు ఆలయాన్ని సందర్శించి అభివృద్ధి పనులను పరిశీలించానని, ప్రస్తుతం వేగంగా కొనసాగుతూ స్లాబులు పూర్తయ్యాయని, నవంబర్ మొదటివారం తర్వాత రాతి నిర్మాణ పనులు చేపడతామని అన్నారు.

ఆలయ అభివృద్ధి పనులకు సంబంధించి ప్రతివారం జిల్లా కలెక్టర్, సబ్ కలెక్టర్, ఆర్ అండ్ బి, దేవాదాయ శాఖ అధికారులు సమీక్ష నిర్వహిస్తూ మంచి పురోగతి సాధిస్తున్నారని అధికారులను మంత్రి అభినందించారు.

వర్షాకాలంలో గోదావరి ఉధృతి సమయంలో భద్రాచలం పట్టణంలోని లోతట్టు ప్రాంతాల్లో వరద ముంపు లేకుండా చూడాలని భద్రాచలం ఎమ్మెల్యే విజ్ఞప్తి చేశారని, దీంతో యుద్ధప్రాతిపదికన ప్రణాళికలు సిద్ధం చేయాల్సిందిగా సంబంధిత అధికారులను ఆదేశించినట్లు మంత్రి తెలిపారు. అలాగే ఈసారి గోదావరి పుష్కరాలకు లక్షల్లో భక్తులు వచ్చే అవకాశం ఉందని, ఇందుకు తగ్గట్టుగా ఘాట్లను సిద్ధం చేస్తామని, భక్తులకు ఎలాంటి అసౌకర్యం కలగకుండా రాష్ట్ర ప్రభుత్వం పూర్తి చర్యలు చేపడుతుందని వివరించారు.

ఈ కార్యక్రమంలో డిసిసి అధ్యక్షురాలు దేవీ ప్రసన్న, కాంగ్రెస్ సీనియర్ నాయకులు గోపాలరావు, పలువురు ప్రజాప్రతినిధులు, అధికారులు, నాయకులు పాల్గొన్నారు.