కాంగ్రెస్ ప్రభుత్వ ముందుచూపు లేని విధానాల వల్లే ఎండిన పైర్లు, విద్యుత్ సంక్షోభం: బీజేపీ రాష్ట్ర అధ్యక్షుడు ఎన్. రాంచందర్ రావు

నల్గొండ జిల్లాలోని కనగల్, నల్గొండ రూరల్ మండలాలతో పాటు చిన్న మాదారం తదితర గ్రామాల్లో వేలాది ఎకరాల ఆయకట్టు పూర్తిగా బోరుబావులపైనే ఆధారపడి సాగవుతోందని రాంచందర్ రావు గుర్తుచేశారు. కాంగ్రెస్ ప్రభుత్వ ప్రకటనల ప్రకారం 12 నుంచి 15 గంటల విద్యుత్ ఇస్తున్నామని ప్రచారం చేసుకుంటున్నప్పటికీ, క్షేత్రస్థాయిలో అందుతున్నది గరిష్టంగా ఐదు గంటలు మాత్రమేనని రైతులు వాపోతున్నారని తెలిపారు. అది కూడా తీవ్రమైన ట్రిప్పింగ్‌లు, బ్రేక్‌డౌన్లతో సరఫరా అవుతుండటంతో భూగర్భ జలాలు తోడలేక కళ్లముందే పంటలు ఎండిపోతున్నాయని ఆవేదన వ్యక్తం చేశారు. కరెంట్ లేక ఒకవైపు పొలాలు ఎండుతుంటే, మరోవైపు గ్రామాల్లో ప్రజలు, చిన్నారులు ఫ్యాన్లు తిరగక తీవ్ర ఉక్కపోత, దోమలతో నరకయాతన అనుభవిస్తున్నారని ఫైరయ్యారు.

వరంగల్ ‘రైతు డిక్లరేషన్’ సభలో కాంగ్రెస్ అగ్రనేతలు రాహుల్ గాంధీ, ప్రియాంక గాంధీలు ప్రధానమంత్రి ఫసల్ బీమా యోజన కంటే మెరుగైన బీమా పథకాన్ని తెస్తామని నమ్మబలికి, అధికారంలోకి వచ్చాక రైతులకు కనీస బీమా రక్షణ లేకుండా మోసం చేశారని విమర్శించారు. గత బీఆర్ఎస్ ప్రభుత్వం 2018 నుంచి ప్రీమియం చెల్లించకుండా ఫసల్ బీమాను పక్కనబెట్టగా, ప్రస్తుత కాంగ్రెస్ ప్రభుత్వం కూడా అదే నిర్లక్ష్యాన్ని కొనసాగిస్తూ రైతుల నోట్లో మట్టికొడుతోందన్నారు. పసిఫిక్ మహాసముద్రంలో ఏర్పడిన ఎల్-నినో ప్రభావం వల్ల వర్షాభావం, ప్రకృతి వైపరీత్యం సంభవిస్తుందనే సంకేతాలు ముందే తెలిసినప్పటికీ రాష్ట్ర ప్రభుత్వం ఎలాంటి ముందస్తు చర్యలు చేపట్టకపోవడం దారుణమన్నారు. ఇప్పటికైనా కాంగ్రెస్ ప్రభుత్వం మేల్కొని, కర్ణాటక ప్రభుత్వం తరహాలోనే కేంద్ర ప్రభుత్వ సహాయం కోరి కేంద్ర బృందాన్ని రప్పించి పంట నష్టాన్ని సమగ్రంగా అంచనా వేయించాలని, రైతులకు తక్షణ పరిహారం చెల్లించాలని డిమాండ్ చేశారు. రైతులను ఆదుకునే విషయంలో కేంద్ర ప్రభుత్వం అన్ని విధాలా సహకరించేందుకు సిద్ధంగా ఉందని స్పష్టం చేశారు. అలాగే పంటలు వేయవద్దని రైతులకు చెప్పడం కాకుండా, ప్రత్యామ్నాయ పంటలు, ఆరుతడి పంటలు, కూరగాయలు, వైవిధ్యమైన సాగు పద్ధతులపై ఎఫ్‌పీవోలు, వ్యవసాయ అధికారులతో రైతులకు అవగాహన కల్పించే బాధ్యతను ప్రభుత్వం విస్మరించిందని ఆరోపించారు.

హైదరాబాద్ నగరవాసుల తాగునీటి అవసరాలు నాగార్జునసాగర్ నుంచి ఫేజ్-1, ఫేజ్-2, ఫేజ్-3 ద్వారా తీరుతున్నాయని, నగరంలోనూ, పట్టణాల్లోనూ తీవ్ర తాగునీటి ఎద్దడి రాకుండా ఉండాలంటే ఎగువన ఉన్న ఆల్మట్టి, నారాయణపూర్ రిజర్వాయర్లలో నిల్వ ఉన్న నీటిని వెంటనే కిందికి విడుదల చేయించేలా రాష్ట్ర ప్రభుత్వం ఒత్తిడి తీసుకురావాలని డిమాండ్ చేశారు. కృష్ణా నదీ జలాల కేటాయింపుల్లో 811 టీఎంసీలలో తెలంగాణ ప్రవాహ ప్రాంతం ఎక్కువగా ఉండి కనీసం 500 టీఎంసీలు రావాల్సి ఉండగా, గత కేసీఆర్ ప్రభుత్వం కేవలం 299 టీఎంసీలకే సంతకం పెట్టి తెలంగాణకు తీరని ద్రోహం చేసిందన్నారు. ఎగువన కర్ణాటక ప్రభుత్వం సుప్రీంకోర్టు ఆదేశాలను సైతం ఉల్లంఘించి ఆల్మట్టి డ్యామ్ ఎత్తును 5 మీటర్లు పెంచుతుంటే గత బీఆర్ఎస్, ప్రస్తుత కాంగ్రెస్ ప్రభుత్వాలు ప్రేక్షకపాత్ర వహించాయని మండిపడ్డారు. రాబోయే కేఆర్ఎంబీ (KRMB), అపెక్స్ కౌన్సిల్ సమావేశాల్లో మన న్యాయమైన వాటాపై రాజీలేకుండా బలంగా వాదనలు వినిపించాలని డిమాండ్ చేశారు. మరోవైపు వెలిగొండ ప్రాజెక్టు ద్వారా ఏపీ ప్రభుత్వం ఫ్లడ్ వాటర్‌‌తో పాటు తెలంగాణ రాష్ట్రానికి కేటాయించిన నికర జలాలను తరలించుకుపోతున్న వ్యవహారంపై కాంగ్రెస్ ప్రభుత్వం ప్రజలకు వాస్తవాలు వెల్లడించాలని, తెలంగాణ నికర జలాల పరిరక్షణ కోసం బీజేపీ రాజీలేని పోరాటం చేస్తుందని హెచ్చరించారు.

ఇటీవల క్షేత్రస్థాయి పరిస్థితులను పరిశీలించేందుకు, రైతుల కష్టాలు, సమస్యలు తెలుసుకునేందుకు తాను స్వయంగా జూరాల ప్రాజెక్టు వద్దకు వెళితే పోలీసులు అడ్డుకున్నారని రాంచందర్ రావు మండిపడ్డారు. రైతులకు మద్దతుగా రాష్ట్ర ప్రభుత్వంపై ఒత్తిడి తేవడంతో అధికారులు అదే రోజు సాయంత్రం కొంత నీటిని విడుదల చేయడంతో ఆ పరివాహక ప్రాంత రైతులు కాస్త ఊపిరి పీల్చుకున్నారని తెలిపారు. జూరాల వద్ద అదనపు వరద నీటిని ఒడిసిపట్టి నిల్వ చేయడానికి రిజర్వాయర్ ట్యాంకులు నిర్మిస్తే నీటి సమస్య పరిష్కారమయ్యేదని, దీనికి ఇప్పటికే పరిపాలనా అనుమతులు ఉన్నప్పటికీ రాష్ట్ర ప్రభుత్వం పట్టించుకోవడం లేదన్నారు. కేవలం రూ. 900 కోట్లతో నెట్టెంపాడు, డిండి, కల్వకుర్తి తదితర చిన్న ప్రాజెక్టుల మరమ్మతులు, డీసిల్టింగ్ పనులు పూర్తి చేసి ఉంటే కృష్ణా పరివాహక ప్రాంతంలో ఇంతటి నీటి కొరత ఉండేది కాదన్నారు. తుంగభద్ర పరిధిలోని ఆర్డీఎస్ (రాజోలిబండ)లో 15 టీఎంసీల సామర్థ్యం ఉంటే పూడికతీయక కేవలం 5 టీఎంసీలకే పరిమితమైందన్నారు. చిన్న ప్రాజెక్టుల మరమ్మతులకు కొన్ని వందల కోట్లు సరిపోతాయని, కానీ కమీషన్ల కోసం గత బీఆర్ఎస్ ప్రభుత్వం రూ. లక్షల కోట్లు కాళేశ్వరంపై తగలేయగా, ప్రస్తుత కాంగ్రెస్ ప్రభుత్వం కూడా వందల కోట్ల పనులను వదిలేసి పెద్ద ప్రాజెక్టుల జపం చేస్తోందని విమర్శించారు.

కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల విషయంలో సరైన డిజైనింగ్ లేకపోవడం, నాణ్యతా లోపాలపై జస్టిస్ పీసీ ఘోష్ కమిషన్ ఇచ్చిన నివేదికను కాంగ్రెస్ ప్రభుత్వం తక్షణమే ప్రజల ముందుంచాలని డిమాండ్ చేశారు. కేంద్ర నేషనల్ డ్యామ్ సేఫ్టీ అథారిటీ (NDSA) ఇచ్చిన సూచనల ప్రకారం ఆ మూడు బ్యారేజీలకు ఏ విధంగా మరమ్మతులు చేపట్టాలి, వాటిని తిరిగి ఎలా వినియోగంలోకి తీసుకురావాలనే విషయాలను ప్రభుత్వం బహిర్గతం చేయాలన్నారు.

అదేవిధంగా రాష్ట్రంలో విద్యుత్ కొరతకు బొగ్గు కొరతే కారణమంటూ కాంగ్రెస్ ప్రభుత్వం నెపం మోపే ప్రయత్నం చేయడం హాస్యాస్పదమని రాంచందర్ రావు కొట్టిపారేశారు. సింగరేణిలో కేంద్ర ప్రభుత్వానికి 49 శాతం వాటా ఉన్నప్పటికీ యాజమాన్యం, పరిపాలనా నియంత్రణ, బదిలీలన్నీ రాష్ట్ర ప్రభుత్వం చేతుల్లోనే ఉన్నాయన్నారు. కేంద్ర ప్రభుత్వం సింగరేణికి ఎలాంటి వేలం (ఆక్షన్) లేకుండానే తాడిచర్ల బొగ్గు బ్లాక్‌ను కేటాయించి వందల కోట్ల రూపాయల ఆర్థిక వెసులుబాటు కల్పించిందని గుర్తుచేశారు. సింగరేణికి రావాల్సిన బకాయిలను కేంద్రం ఎప్పటికప్పుడు చెల్లిస్తుంటే, రాష్ట్ర ప్రభుత్వమే వేల కోట్ల బకాయిలు చెల్లించకుండా నిర్లక్ష్యం చేస్తోందన్నారు. థర్మల్ విద్యుత్‌తో పాటు జెన్‌కో, డిస్కమ్‌ల సమన్వయం, హైడల్, సోలార్ ప్రాజెక్టులు, ఛత్తీస్‌గఢ్ నుంచి వచ్చే విద్యుత్‌ను సమర్థవంతంగా వినియోగించుకోవడంలో విఫలమై, బొగ్గు కొరత నెపం మోపి తప్పించుకోవాలని చూడటం సిగ్గుచేటని మండిపడ్డారు. ఇప్పటికైనా కాంగ్రెస్ ప్రభుత్వం కక్షపూరిత, నిర్లక్ష్య వైఖరి వీడి అన్నదాతలను, రాష్ట్ర ప్రజలను ఆదుకోవాలని రాంచందర్ రావు డిమాండ్ చేశారు.