సమాచార హక్కు చట్టానికి తూట్లు: కళాశాల ప్రిన్సిపాల్ బాధ్యతారాహిత్యంపై 'రైట్స్ మీడియా' చట్టబద్ధమైన పోరాటం

సమాచార హక్కు చట్టం నిబంధనల ప్రకారం, ప్రతి ప్రభుత్వ సంస్థలో పబ్లిక్ ఇన్ఫర్మేషన్ ఆఫీసర్ (PIO), అసిస్టెంట్ PIO (APIO), అప్పీలేట్ అధికారుల పేర్లు, వారి హోదాలు, సంప్రదించాల్సిన ఫోన్ నంబర్లు స్పష్టంగా కనిపించేలా బోర్డు ఏర్పాటు చేయాలి. కానీ, వర్థన్నపేట ప్రభుత్వ జూనియర్ కళాశాలలో బోర్డును ఏర్పాటు చేసినప్పటికీ, అధికారుల వివరాలను గాలికొదిలేసి కేవలం ఖాళీ గడులతో వదిలేశారు.

దీనిపై రైట్స్ మీడియా వర్థన్నపేట నియోజకవర్గ ఇన్‌చార్జి బుర్ర వెంకటరమణ కళాశాల ప్రిన్సిపాల్ సుజాతను ఫోన్‌లో సంప్రదించి వివరణ కోరారు. దానికి ఆమె అత్యంత బాధ్యతారహితంగా స్పందిస్తూ.. “ఏ బోర్డు..? సమాచార హక్కు..? ఎక్కడ పెట్టాలి ఆ బోర్డు..?” అంటూ సమాచార హక్కు చట్టాన్ని వ్యంగ్యంగా ప్రశ్నించారు. అంతటితో ఆగకుండా, “మీరు ఇంతకుముందు నిధుల దుర్వినియోగం గురించి వార్త రాశారు కదా.. ఆ నిధులు ఎక్కడ ఉన్నాయో మీకే తెలియాలి, దాని మీద కూడా మీరే రాయండి.. రాయిస్తాములే” అంటూ ఒక జర్నలిస్టుపైనే ఎదురుదాడికి దిగుతూ, చట్టం పట్ల తనకున్న అహంకారాన్ని బహిర్గతం చేశారు.

ప్రిన్సిపాల్ నిర్లక్ష్య వైఖరిని రైట్స్ మీడియా సొసైటీ తీవ్రంగా పరిగణించింది. చట్టం పరిధిలో ప్రాతినిధ్యం వహిస్తూ, రైట్స్ మీడియా వరంగల్ జిల్లా అధికార ప్రతినిధి మ్యాకల మహేష్ నేరుగా వరంగల్ జిల్లా ఇంటర్మీడియట్ విద్యాశాఖ అధికారి (DIEO) శ్రీధర్ సుమన్‌ను కలిశారు. ప్రిన్సిపాల్ సుజాత మాట్లాడిన కాల్ రికార్డింగ్, ఖాళీ ఆర్టీఐ బోర్డు దృశ్యాలను ఆధారాలుగా సమర్పించి ఫిర్యాదు చేశారు.

దీనిపై డీఐఈఓ శ్రీధర్ సుమన్ బాధ్యతాయుతంగా స్పందించారు. "ప్రతి కళాశాల ముందు ఆర్టీఐ బోర్డు ఖచ్చితంగా ఉండాలి. అందులో అప్పీలేట్ అథారిటీ, పీఐఓ వివరాలు స్పష్టంగా ఉండాలి. వర్థన్నపేట కళాశాలలో రంగులు వేయడం వల్ల పేర్లు చెరిగిపోయి ఉండొచ్చు. తక్షణమే ఆ బోర్డును అప్‌డేట్ చేసి, పూర్తి వివరాలను పొందుపరచాలని ఆదేశిస్తాను" అని ఆయన రైట్స్ మీడియా ప్రతినిధికి హామీ ఇచ్చారు.

డీఐఈఓ స్పందనను రైట్స్ మీడియా సొసైటీ స్వాగతిస్తోంది. అయితే, కేవలం రంగులు వేయించి, బోర్డుపై పేర్లు రాయించడం వల్ల వ్యవస్థలో మార్పు రాదని సంస్థ స్పష్టం చేస్తోంది.

రాజ్యాంగం కల్పించిన సమాచార హక్కు చట్టం గురించి "ఏ బోర్డు? ఎక్కడ పెట్టాలి?" అని ప్రశ్నిస్తూ, సమాచారం అడిగిన వారిపైనే వ్యంగ్యాస్త్రాలు సంధించిన ప్రిన్సిపాల్ తీరు చట్ట ఉల్లంఘన కిందకే వస్తుంది. కేవలం బోర్డు ఏర్పాటుతో ఈ సమస్య ముగియదు. సమాచార హక్కు చట్టం-2005 విలువ, పౌరులకు జవాబుదారీగా ఉండాల్సిన బాధ్యత సదరు ప్రిన్సిపాల్ కు తెలిసొచ్చేలా.. ఆమెపై విద్యాశాఖ తక్షణమే కఠినమైన శాఖాపరమైన క్రమశిక్షణా చర్యలు (Disciplinary Action) తీసుకోవాలని రైట్స్ మీడియా సొసైటీ డిమాండ్ చేస్తోంది.

బాధ్యులపై చట్టపరమైన చర్యలు తీసుకున్నప్పుడే వ్యవస్థలో పారదర్శకత వస్తుందని, అంతవరకు రైట్స్ మీడియా సొసైటీ ఈ పోరాటాన్ని విడిచిపెట్టదని స్పష్టం చేస్తోంది.

గమనిక: పై వార్తా కథనం కు సంబంధిత వీడయో, ఆడియో ఆధారాలు క్రింద అటాచ్ చేయడం జరిగింది.