మైసంపల్లికి సాగునీరు.. ఆయిల్‌పామ్ సాగుపై దృష్టి సారించాలి: మంత్రి పొన్నం ప్రభాకర్

రైతులు ఆయిల్‌పామ్ సాగు వైపు దృష్టి సారించాలని మంత్రి పొన్నం ప్రభాకర్ సూచించారు. పంట వేసిన మూడో సంవత్సరం నుంచి ఎకరాకు లక్ష రూపాయల వరకు ఆదాయం పొందే అవకాశం ఉందని తెలిపారు. సుమారు 30 సంవత్సరాల వరకు దిగుబడి పొందే ఈ పంటకు దొంగలు, కోతుల బెడద తక్కువగా ఉంటుందని, అధికంగా నీరు అవసరం ఉండదని పేర్కొన్నారు. ఆయిల్‌పామ్ సాగుకు ముందుకు వచ్చే రైతుల నుంచి డీడీలు తీసుకోవాలని అధికారులను ఆదేశించారు.

గ్రామంలో ప్రతి నీటి బొట్టును ఒడిసిపట్టేలా ఇంటికి ఇంకుడు గుంతలు, పంట కుంటలు, గ్రామ కుంటలు నిర్మించేలా చర్యలు తీసుకోవాలని అధికారులను, ప్రజాప్రతినిధులను మంత్రి ఆదేశించారు.

మైసంపల్లి గ్రామంలో 13 మందికి ఇందిరమ్మ ఇళ్లు మంజూరు చేశామని, మరికొన్ని ఇళ్లను త్వరలో మంజూరు చేస్తామని మంత్రి తెలిపారు. కొత్తగా దాదాపు 300కు పైగా రేషన్ కార్డులు మంజూరు చేసి, వాటి ద్వారా ఒక్కొక్కరికి 6 కిలోల చొప్పున బియ్యం పంపిణీ చేస్తున్నామని చెప్పారు.

298 మందికి గృహజ్యోతి పథకం ద్వారా 200 యూనిట్ల ఉచిత విద్యుత్, 226 మంది రైతులకు రుణమాఫీ, 664 మంది లబ్ధిదారులకు రైతు భరోసా అందిస్తున్నామని తెలిపారు. వివిధ అభివృద్ధి పనుల కింద దాదాపు రూ.388.49 లక్షల నిధులు మంజూరు చేశామని వెల్లడించారు. అలాగే 483 మందికి 8.64 మెట్రిక్ టన్నుల సన్నబియ్యం సరఫరా చేస్తున్నట్లు తెలిపారు.

గ్రామంలో జరిగే ప్రతి ఫంక్షన్‌లో స్టీల్ ప్లేట్లను మాత్రమే వినియోగించేలా చూడాలని మంత్రి సూచించారు. ఫంక్షన్లలో ప్లాస్టిక్ ప్లేట్లను ఉపయోగిస్తే కేసులు నమోదు చేయాలని అధికారులను ఆదేశించారు. నిబంధనల అమలులో నిర్లక్ష్యం వహిస్తే గ్రామ కార్యదర్శిపై కఠిన చర్యలు తీసుకుంటామని హెచ్చరించారు.

మైసంపల్లి గ్రామానికి వాటర్ ప్లాంట్, ఓపెన్ జిమ్ మంజూరు చేస్తామని మంత్రి తెలిపారు. ఐకేపీ సెంటర్‌ నుంచి కోహెడ, సీసీ పల్లి, కాచాపూర్, మైసంపల్లి గ్రామాలను అనుసంధానం చేస్తూ 9.5 కిలోమీటర్ల మేర రోడ్డు నిర్మాణానికి రూ.8.5 కోట్లు మంజూరు చేశామని చెప్పారు. త్వరలో రోడ్డు పనులు చేపట్టనున్నట్లు వెల్లడించారు.

అలాగే కాచాపూర్ నుంచి పందిళ్ల వరకు బ్రిడ్జి, బీటీ రోడ్డు నిర్మాణానికి రూ.3 కోట్లతో టెండర్ ప్రక్రియ కొనసాగుతోందని మంత్రి పొన్నం ప్రభాకర్ తెలిపారు.