వర్ధన్నపేట జూనియర్ కళాశాలలో బోర్డు ఉంది.. అధికారుల పేర్లు ఏవి?

కళాశాల ప్రిన్సిపల్ కార్యాలయం ఎదుట గోడపై సమాచార హక్కు బోర్డును ఏర్పాటు చేసినప్పటికీ, అందులో ఉండాల్సిన ప్రధాన వివరాలు గాలికి వదిలేశారు. పబ్లిక్ ఇన్ఫర్మేషన్ ఆఫీసర్ (PIO), అసిస్టెంట్ PIO (APIO), అప్పిలేట్ అథారిటీ అధికారుల పేర్లు, వారి హోదాలు, ఫోన్ నంబర్లు నమోదు చేయకుండా కేవలం ఖాళీ గడులతో బోర్డును వదిలేశారు. దీంతో కళాశాలకు సంబంధించిన ఏవైనా వివరాలు తెలుసుకోవాలన్నా, దరఖాస్తు చేయాలన్నా ఎవరిని సంప్రదించాలో తెలియక విద్యార్థులు, తల్లిదండ్రులు తీవ్ర గందరగోళానికి గురవుతున్నారు.

సమాచార హక్కు చట్టం-2005, సెక్షన్ 4(1)(b) ప్రకారం ప్రతి ప్రభుత్వ మరియు ప్రభుత్వ ఆధారిత సంస్థల ప్రాంగణంలో:
• పబ్లిక్ ఇన్ఫర్మేషన్ ఆఫీసర్ (PIO) పేరు & హోదా
• అసిస్టెంట్ PIO (APIO) పేరు & సంప్రదించాల్సిన ఫోన్ నంబర్
• అప్పిలేట్ అథారిటీ వివరాలు
స్పష్టంగా ప్రజలకు కనిపించేలా ప్రదర్శించాలి. కానీ వర్ధన్నపేట ప్రభుత్వ జూనియర్ కళాశాలలో ఈ చట్టపరమైన నిబంధనలను బహిరంగంగానే ఉల్లంఘిస్తున్నారు. బోర్డులు పెట్టి పేర్లు రాయకుండా వదిలేయడం వెనుక అంతర్యం ఏమిటని స్థానికులు, హక్కుల కార్యకర్తలు ప్రశ్నిస్తున్నారు.

కళాశాలలో నిధుల వినియోగం, అడ్మిషన్లు, మధ్యాహ్న భోజన పథకం అమలు మరియు వివిధ రకాల ఫీజుల వసూళ్లలో అక్రమాలు జరుగుతున్నాయని, వాటికి సంబంధించిన సమాచారం బయటకు రాకుండా తొక్కేసేందుకే అధికారులు కావాలనే RTI బోర్డును పూర్తిస్థాయిలో అందుబాటులో ఉంచలేదని విద్యార్థి, ప్రజా సంఘ నాయకులు ఆరోపిస్తున్నారు.

ఇప్పటికైనా జిల్లా ఇంటర్మీడియట్ విద్యాశాఖ అధికారి (DIEO) తక్షణమే స్పందించి, వర్ధన్నపేట ప్రభుత్వ జూనియర్ కళాశాలలో సమగ్రమైన వివరాలతో కూడిన RTI బోర్డును వెంటనే ఏర్పాటు చేయించాలని కోరుతున్నారు. అలాగే చట్ట నిబంధనలను నిర్లక్ష్యం చేస్తూ వ్యవహరిస్తున్న కళాశాల ప్రిన్సిపాల్‌పై శాఖాపరమైన చర్యలు తీసుకోవాలని డిమాండ్ చేస్తున్నారు.