అభివృద్ధి కార్యక్రమాలపై రాజకీయ విమర్శలు చేయడం కంటే ప్రజలకు ఉపయోగపడే పనుల్లో అన్ని పార్టీలు భాగస్వాములు కావాలని ఎమ్మెల్యే సూచించారు. ఎన్నికల సమయంలో రాజకీయాలు చేయడం సహజమని, కానీ నిరంతరం రాజకీయ విమర్శలకే ప్రాధాన్యత ఇవ్వడం వల్ల ప్రజలకు ఎలాంటి ప్రయోజనం ఉండదని వ్యాఖ్యానించారు.
గతంలో కుడా భూముల విషయంలో రూ.50 కోట్లు, రూ.70 కోట్ల అవినీతి జరిగిందంటూ ఆరోపణలు చేసిన విషయాన్ని ప్రస్తావిస్తూ, ఆ ఆరోపణలపై ప్రజలకు వాస్తవాలు తెలియాల్సిన అవసరం ఉందన్నారు. సంబంధిత భూములను ప్రజా ప్రయోజనాలకు వినియోగించే దిశగా ప్రభుత్వం చర్యలు తీసుకుంటోందని, కొనుగోలుదారులు ముందుకు రాని నేపథ్యంలో ఐటీ టవర్స్ ఏర్పాటుకు వినియోగించే అంశాన్ని పరిశీలిస్తున్నామని తెలిపారు.
వరంగల్ జిల్లా అభివృద్ధి కోసం ఎమ్మెల్యేలు, ఎంపీలు, మంత్రులు, కుడా చైర్మన్, జిల్లా కాంగ్రెస్ నాయకులు అందరూ సమన్వయంతో టీమ్‌వర్క్‌గా పనిచేస్తున్నామని పేర్కొన్నారు. పారిశ్రామిక అభివృద్ధి, ఐటీ రంగం విస్తరణ, యువతకు ఉద్యోగ అవకాశాలు కల్పించడం వంటి అంశాలను ప్రాధాన్యతగా తీసుకొని ముందుకు సాగుతున్నామని వివరించారు.
కాంగ్రెస్ ప్రభుత్వం అధికారంలోకి వచ్చిన తర్వాత ప్రజల జీవన ప్రమాణాలను మెరుగుపరిచేందుకు ఆరు గ్యారంటీల అమలుతో పాటు అనేక సంక్షేమ కార్యక్రమాలను చేపడుతోందని ఎమ్మెల్యే పేర్కొన్నారు.
మహాలక్ష్మి పథకం ద్వారా మహిళలకు ఆర్టీసీ బస్సుల్లో ఉచిత ప్రయాణ సౌకర్యం, రూ.500కే గ్యాస్ సిలిండర్ అందించడం, గృహజ్యోతి పథకం ద్వారా అర్హులైన కుటుంబాలకు నెలకు 200 యూనిట్ల వరకు ఉచిత విద్యుత్ అందించడం వంటి కార్యక్రమాలు ప్రజలకు ఉపయోగపడుతున్నాయని తెలిపారు.
అలాగే ఇందిరమ్మ ఇళ్ల పథకం ద్వారా సొంత ఇల్లు లేని పేదలకు ఇళ్ల నిర్మాణానికి ఆర్థిక సహాయం, రైతు భరోసా ద్వారా రైతులకు పెట్టుబడి సాయం, చేయూత పథకం ద్వారా అర్హులకు సామాజిక భద్రతా పింఛన్లు, రాజీవ్ ఆరోగ్యశ్రీ ద్వారా రూ.10 లక్షల వరకు వైద్య చికిత్సా భరోసా అందిస్తున్నట్లు వివరించారు.
ప్రజాప్రతినిధులుగా ప్రజలకు అందుబాటులో ఉండి వారి సమస్యలను పరిష్కరించడమే తమ బాధ్యత అని ఎమ్మెల్యే నాయిని రాజేందర్ రెడ్డి అన్నారు. ప్రతిరోజూ రెండు డివిజన్లలో అభివృద్ధి పనులకు శంకుస్థాపనలు, ప్రారంభోత్సవాలు నిర్వహిస్తూ పనుల పురోగతిని స్వయంగా పర్యవేక్షిస్తున్నామని తెలిపారు.
ప్రజలకు ఇచ్చిన హామీలను నెరవేర్చడంతో పాటు వరంగల్ పశ్చిమ నియోజకవర్గాన్ని అభివృద్ధి పథంలో ముందుకు తీసుకెళ్లేందుకు నిరంతరం కృషి చేస్తున్నామని పేర్కొన్నారు. ప్రజల అవసరాలను గుర్తించి ప్రాధాన్యత క్రమంలో అభివృద్ధి పనులు చేపడతామని, ప్రతి డివిజన్‌ను ఆదర్శవంతమైన ప్రాంతంగా తీర్చిదిద్దడమే తమ లక్ష్యమని స్పష్టం చేశారు.
ఈ కార్యక్రమంలో కుడా చైర్మన్ గుండు సుధారాణి, మాజీ ఎమ్మెల్సీ పుల్ల పద్మ, డివిజన్ ఇంచార్జ్ బోడ డిన్న, మాజీ కార్పొరేటర్ దేవరకొండ విజయలక్ష్మి సురేందర్, డివిజన్ అధ్యక్షులు సమద్, మాజీ అధ్యక్షులు సంగీత్, గోల్కొండ సాంబయ్య, బొమ్మ సురేష్, పూర్ణ, క్రాంతి, రోషన్ తదితరులు పాల్గొన్నారు.
