బెంగళూరు ఐఐఎస్సీలో సేవా ఫస్ట్ ఇన్నోవేషన్ ఛాలెంజ్ ప్రారంభం

పాఠశాల విద్యార్థులు, ఐటీఐ శిక్షణార్థులు, పాలిటెక్నిక్ విద్యార్థులు, కళాశాలలు, విశ్వవిద్యాలయాలను ఒకే వేదికపైకి తెచ్చి ప్రజల దైనందిన జీవితాలను మెరుగుపరిచే వినూత్న పరిష్కారాలను రూపొందించేందుకు ఈ వేదిక దోహదపడుతుందని తెలిపారు. ఈ ఛాలెంజ్‌లో వెలువడే ఉత్తమ ఆలోచనలకు మెంటరింగ్, ఇంక్యుబేషన్ ద్వారా ప్రోత్సాహం అందిస్తామని వెల్లడించారు. నూతన ఆవిష్కరణలను ప్రోత్సహించడం ద్వారా 2047 నాటికి అభివృద్ధి చెందిన భారత్ సాధనలో యువత కీలక పాత్ర పోషించాలని పిలుపునిచ్చారు.

దేశంలోని యువ జనాభా దేశానికే కాకుండా ప్రపంచానికి అవసరమైన పరిష్కారాలను అభివృద్ధి చేయడంలో ప్రధాన భూమిక పోషిస్తోందని మంత్రి పేర్కొన్నారు. టింకరింగ్ ల్యాబ్స్, ఇన్నోవేషన్ కౌన్సిల్స్, స్మార్ట్ ఇండియా హ్యాకథాన్ వంటి కార్యక్రమాల ద్వారా దేశంలో నూతన ఆవిష్కరణల వాతావరణం వేగంగా విస్తరిస్తోందన్నారు. పునరుత్పాదక ఇంధన వనరులు, గ్రీన్ హైడ్రోజన్, మారుతున్న సాంకేతిక రంగాలలో సరికొత్త ఆవిష్కరణల అవసరం ఎంతైనా ఉందని నొక్కి చెప్పారు. ఈ కార్యక్రమంలో భాగంగా విద్యార్థులు ప్రదర్శించిన నూతన ప్రాజెక్టులను పరిశీలించి వారి ఆలోచనలను అడిగి తెలుసుకున్నారు.

స్టార్టప్‌లు, పారిశ్రామిక భాగస్వాములు యువ ఆవిష్కర్తలకు తగిన మార్గదర్శకత్వం అందించాలని మంత్రి కోరారు. ఆలోచనలను ఆచరణాత్మక రూపంలోకి తీసుకురావడానికి పరిశ్రమల సహకారం ఎంతో అవసరమని తెలిపారు. దేశ భవిష్యత్తును తీర్చిదిద్దడంలో యువత పట్టుదల, సృజనాత్మకత అత్యంత కీలకమని స్పష్టం చేశారు.