ఆపదలో ఉన్న కుటుంబాలకు అండగా మంత్రి పొంగులేటి

జాన్ బాత్ తండా సర్పంచ్ భీమా నాయక్ ఇటీవల రోడ్డు ప్రమాదానికి గురై చికిత్స అనంతరం ఇంటి వద్ద విశ్రాంతి తీసుకుంటున్నారు. ఈ విషయం తెలుసుకున్న మంత్రి పొంగులేటి ఆయన నివాసానికి వెళ్లి పరామర్శించారు. ఆరోగ్య పరిస్థితిని అడిగి తెలుసుకుని త్వరగా కోలుకోవాలని ఆకాంక్షించారు.

మంగళగూడెం గ్రామానికి చెందిన ఒకే కుటుంబంలోని మోటం మణియమ్మ, మోటం కీర్తన, కావ్య ఇటీవల ప్రమాదవశాత్తు కాలువలో పడి మృతిచెందారు. ఒకే కుటుంబానికి చెందిన ముగ్గురు ప్రాణాలు కోల్పోవడంతో తీవ్ర విషాదంలో ఉన్న కుటుంబ సభ్యులను మంత్రి పొంగులేటి పరామర్శించారు. వారి దీనస్థితిని చూసి చలించిన ఆయన.. బాధిత కుటుంబానికి గ్రామంలో ఇంటి స్థలం కేటాయించడంతోపాటు ఇందిరమ్మ ఇల్లు మంజూరు చేసి నిర్మించి ఇవ్వాలని తహసీల్దార్‌ను ఆదేశించారు. కష్టకాలంలో మంత్రి చూపిన చొరవపై గ్రామస్థులు హర్షం వ్యక్తం చేశారు.

గోళ్లపాడు గ్రామానికి చెందిన పరికిపల్లి భద్రమ్మ అనే వృద్ధురాలు మృతిచెందడంతో ఆమె నివాసానికి వెళ్లిన మంత్రి నివాళులర్పించారు. కుటుంబ సభ్యులకు సానుభూతి తెలిపారు.
ఈ కార్యక్రమాల్లో మాజీ ఎమ్మెల్సీ బాలసాని లక్ష్మీనారాయణ, కాంగ్రెస్ పార్టీ ఖమ్మం రూరల్ మండల అధ్యక్షుడు తోట వీరభద్రం, మాజీ మార్కెట్ కమిటీ చైర్మన్ మద్ది మల్లారెడ్డి, కాంగ్రెస్ నాయకులు వీరెల్లి అప్పారావు, కొప్పుల చంద్రశేఖర్, పలువురు సర్పంచులు, నాయకులు పాల్గొన్నారు.