కాంగ్రెస్ పార్టీ కోసం కష్టపడిన న్యాయవాదులకు సముచిత స్థానం: మంత్రి పొన్నం ప్రభాకర్

న్యాయవాద వృత్తి ఒక ప్రత్యేకమైనదని, తెలంగాణ రాష్ట్ర సాధనలో న్యాయవాదుల పాత్ర మరువలేనిదని మంత్రి పొన్నం కొనియాడారు. అదేవిధంగా 2023లో కాంగ్రెస్ ‘ప్రజా పాలన’ ప్రభుత్వం అధికారంలోకి రావడంలో కూడా న్యాయవాదులు కీలక పాత్ర పోషించారని ప్రశంసించారు.

ఎమ్మెల్సీ ఎన్నికల్లో కాంగ్రెస్ అభ్యర్థిని గెలిపించాలి
రాబోయే పట్టభద్రుల ఎమ్మెల్సీ ఎన్నికల్లో తోటి న్యాయవాది, కాంగ్రెస్ పార్టీ అభ్యర్థి అయిన సామ రామ్మోహన్ రెడ్డిని గెలిపించడానికి లీగల్ సెల్ సభ్యులంతా సమష్టిగా కృషి చేయాలని పిలుపునిచ్చారు.

రాష్ట్రంలోని 33 జిల్లాల్లో కాంగ్రెస్ పార్టీ కార్యాలయాలు ఉన్నాయని, ఆయా జిల్లాల్లో పార్టీకి సంబంధించిన లీగల్ ఇష్యూస్‌లో అడ్వకేట్లు అండగా నిలవాలని కోరారు. ప్రభుత్వానికి సంబంధించిన అంశాలపై, అలాగే పార్టీ కార్యకర్తలను రక్షించే సమయంలో లీగల్ సెల్ పూర్తి అండగా ఉండాలని సూచించారు.

న్యాయవాదుల సంక్షేమం, పదవులపై హామీలు
కాంగ్రెస్ ప్రభుత్వం ఏర్పడిన నేపథ్యంలో గతంలో జరిగిన నియామకాల స్థానంలో, పార్టీ అనుబంధ న్యాయవాదులకు అవకాశాలు ఇవ్వాల్సి ఉందన్నారు. న్యాయపరమైన పదవుల్లో కాంగ్రెస్ వారికి అవకాశాలు కల్పించడం, న్యాయ సలహాలు తీసుకోవడంలో వారికి ప్రాధాన్యత ఇస్తామన్నారు. నామినేటెడ్ పోస్టుల్లో లీగల్ సెల్ నేతలకు బాధ్యతలు ఇచ్చే అవకాశం ఉంటుందని తెలిపారు. న్యాయవాదుల సమస్యల పరిష్కారం, వారికి ఇళ్ల స్థలాలు లేదా ఇళ్లు మంజూరు చేసే ఆలోచనను ప్రభుత్వం దృష్టికి తీసుకెళ్లి పరిష్కరిస్తామని హామీ ఇచ్చారు. ప్రజల సౌకర్యార్థం ఎల్కతుర్తి లాంటి మారుమూల ప్రాంతాల్లో కూడా ప్రభుత్వం కొత్తగా కోర్టులను ఏర్పాటు చేసిందని మంత్రి ఈ సందర్భంగా గుర్తుచేశారు.