మానసిక దివ్యాంగులను ప్రతిభావంతులుగా తీర్చిదిద్దే బాధ్యత ప్రతి ఒక్కరిదీ

నిజామాబాద్ జిల్లా కేంద్రంలోని మారుతి నగర్ లోని స్నేహ సొసైటీ ఫర్ రూరల్ రీకన్స్ట్రక్షన్ నిర్వహించే మానసిక దివ్యాంగుల పాఠశాల తల్లిదండ్రుల సమావేశము ఏర్పాటు చేసారు. ఈ కార్యక్రమానికి ముఖ్యఅతిథిగా మానసిక వైద్య నిపుణులు డాక్టర్ ఇన్నమూరి రవితేజ ముఖ్య అతిథిగా హాజరై తల్లిదండ్రులను ఉద్దేశించి మాట్లాడారు. మానసిక దివ్యాంగులు తల్లిదండ్రులకు దేవుడిచ్చిన ప్రసాదమని వారిని జాగ్రత్తగా పెంచి, ఉపయోగకర పౌరులుగా తీర్చిదిద్దాలని సూచించారు. మానసిక దివ్యాంగులను తీర్చిదిద్దడంలో తల్లిదండ్రుల పాత్ర చాలా ఎక్కువ(కీలకం)గా ఉంటుందని వారు సరైన దిశలో పిల్లల కోసం సమయాన్ని కేటాయించి, వారిని ప్రతిభ వంతుల పౌరులుగా మార్చడానికి అవకాశం ఉంటుందన్నారు. ప్రతి తల్లిదండ్రులు వారి దివ్యాంగ పిల్లల సమస్యలను గుర్తించి వాటిని క్రమ పద్ధతిలో ఒక పేపర్ పై రాసుకొని వాటిలో చిన్న సమస్యలను ముందుగా తీసుకొని ఆ సమస్యలను దూరం చేయడంలో వారికి కావలసిన సహాయాన్ని అందించాలని తెలిపారు. దీనివల్ల పిల్లల్లో ప్రవర్తన పరమైన సమస్యలు దూరం అవుతాయని తెలిపారు. అదేవిధంగా ప్రతి ఒక్క తల్లి వారి దివ్యాంగ పిల్లల కొరకు ABC పాటర్న్ లో ప్రవర్తనను మార్చవచ్చని చెప్పారు. పిల్లవాడు ప్రవర్తన కంటే ముందు జరిగిన అంశాలను మరియు ప్రవర్తన తర్వాత జరిగిన పరిణామాలను దృష్టిలో పెట్టుకొని పిల్లలను పెంచుకోవాలని కోరారు.