ప్రతి జర్నలిస్టు ఏఐ టెక్నాలజీని అందిపుచ్చుకోవాలి: ముద్దం నరసింహస్వామి

శిక్షణలో భాగంగా ఫేక్ న్యూస్, సైబర్ క్రైమ్, కృత్రిమ మేధ, సోషల్ మీడియా, డిజిటల్ జర్నలిజం తదితర అంశాలపై ముద్దం నరసింహస్వామి జర్నలిస్టులకు అవగాహన కల్పించారు. మీడియా రంగంపై ఏఐ ప్రభావం రోజురోజుకూ పెరుగుతున్న నేపథ్యంలో జర్నలిస్టులు కొత్త సాంకేతికతను అర్థం చేసుకోవడంతో పాటు దానిని బాధ్యతాయుతంగా వినియోగించుకోవాలని సూచించారు. వార్తల సేకరణ, పరిశోధన, కంటెంట్ తయారీ, సమాచార విశ్లేషణ వంటి అంశాల్లో ఏఐ సాధనాలు జర్నలిస్టులకు ఉపయోగపడుతున్నప్పటికీ.. ఏఐ ద్వారా లభించిన సమాచారాన్ని మానవీయంగా ధృవీకరించుకోవడం, సంపాదకీయ విచక్షణతో వ్యవహరించడం అత్యంత కీలకమని వివరించారు.

సోషల్ మీడియాలో వైరల్ అవుతున్న ప్రతి సమాచారాన్ని వార్తగా పరిగణించకుండా.. దాని మూలాలను పరిశీలించి, వాస్తవాలను నిర్ధారించుకున్న తర్వాతే ప్రచురించాలని జర్నలిస్టులకు సూచించారు. ఫేక్ న్యూస్, డీప్‌ఫేక్‌లు, ఏఐ ద్వారా రూపొందించిన కంటెంట్‌ను గుర్తించడం, సోషల్ మీడియా సమాచారాన్ని ధృవీకరించడం, సైబర్ మోసాలు–దాడుల పట్ల అప్రమత్తంగా ఉండటం వంటి అంశాలను శిక్షణలో వివరించారు.

వార్తను వేగంగా అందించడం ఎంత ముఖ్యమో.. వార్త వాస్తవికత, విశ్వసనీయతను కాపాడటం అంతకంటే ముఖ్యమని పేర్కొన్నారు. డిజిటల్ యుగంలో జర్నలిజం కేవలం వార్తా సేకరణ, ప్రచురణకే పరిమితం కాకుండా డిజిటల్ ప్లాట్‌ఫారాలు, సోషల్ మీడియా, ఏఐ ఆధారిత సాధనాలతో ముడిపడి ఉందన్నారు.

ప్రస్తుత మార్పులకు అనుగుణంగా జర్నలిస్టులు తమ నైపుణ్యాలను నిరంతరం అభివృద్ధి చేసుకోవాలని ముద్దం నరసింహస్వామి సూచించారు. కొత్త సాంకేతికతను బాధ్యతాయుతంగా వినియోగిస్తూ, జర్నలిజం యొక్క ప్రాథమిక విలువలైన వాస్తవ నిర్ధారణ, నిష్పక్షపాతత్వం, బాధ్యత, విశ్వసనీయతను కాపాడుకోవాలని అన్నారు.

ఈ సందర్భంగా టీయూడబ్ల్యూజే జిల్లా నాయకులు ముద్దం నరసింహస్వామిని ఘనంగా సత్కరించారు. శిక్షణ కార్యక్రమంలో కామారెడ్డి జిల్లాలోని వివిధ ప్రాంతాలకు చెందిన పలువురు వర్కింగ్ జర్నలిస్టులు పాల్గొన్నారు.