ఓటమి భయంతోనే రాజ్యాంగ సంస్థలపై కాంగ్రెస్, ‘ఇండి’ కూటమి విషప్రచారం..

రాజ్యాంగబద్ధమైన ఎన్నికల కమిషన్ అనేది బీజేపీ లేదా మోదీ ప్రభుత్వం అధికారంలోకి వచ్చిన తర్వాత ఏర్పడింది కాదని, దశాబ్దాలుగా నిష్పక్షపాతంగా సేవలందిస్తున్న గొప్ప వ్యవస్థ అని ఎన్.వి. సుభాష్ స్పష్టం చేశారు. 1993లో టీఎన్ శేషన్ హయాంలో ఏకసభ్య కమిషన్‌గా ఉన్న వ్యవస్థను ముగ్గురు సభ్యుల కమిటీగా మార్చింది కాంగ్రెస్ పార్టీ ప్రభుత్వమేనన్న విషయాన్ని ఆయన గుర్తుచేశారు. పార్లమెంట్‌లో ప్రజాసమస్యలపై చర్చించేందుకు రాజ్యాంగం కల్పించిన గొప్ప అవకాశాన్ని సద్వినియోగం చేసుకోకుండా, రాహుల్ గాంధీ రోడ్లపై పడుకుని చేష్టలు చేస్తూ మీడియా దృష్టిని ఆకర్షించేందుకు దిగజారుడు రాజకీయాలు చేస్తున్నారని దుయ్యబట్టారు.

2027 మొదటి ఆరు నెలల్లో జరగనున్న ఉత్తరప్రదేశ్, పంజాబ్, గోవా, ఉత్తరాఖండ్, మణిపూర్ రాష్ట్రాల అసెంబ్లీ ఎన్నికల్లో కాంగ్రెస్, 'ఇండి' కూటమికి ఘోర పరాజయం తప్పదని తేలిపోవడంతోనే ఇటువంటి కుట్రపూరిత ప్రచారానికి తెరలేపారని సుభాష్ విశ్లేషించారు. ప్రధాని నరేంద్ర మోదీ నేతృత్వంలో దేశం ‘వికసిత్ భారత్ 2047’ దిశగా వేగంగా దూసుకుపోతుండటం, సంక్షేమ పథకాలు క్షేత్రస్థాయిలో ప్రజలందరికీ అందుతుండటంతో కాంగ్రెస్ గ్రాఫ్ పూర్తిగా పడిపోయిందన్నారు. ఢిల్లీ రోడ్లపై కాంగ్రెస్ చేస్తున్న ఈ నిరసనలకు సమాజ్‌వాదీ పార్టీ, టీఎంసీ, డీఎంకే, ఆప్, శరద్ పవార్ ఎన్సీపీ వంటి మిత్రపక్షాలే మద్దతు ఇవ్వకపోవడం వారి ఒంటరితనాన్ని తేటతెల్లం చేస్తోందన్నారు.

దేశవ్యాప్తంగా 13.39 కోట్ల ఓటర్లను జాబితా నుంచి తొలగించారంటూ కాంగ్రెస్ చేస్తున్న ఆరోపణలు అబద్ధాలేనని ఆయన కొట్టిపారేశారు. ఎన్నికల కమిషన్ చట్టబద్ధంగా అమలు చేస్తున్న ఏఎస్డీ (Absent, Shifted, Dead & Duplicate) ప్రక్రియలో భాగంగానే జాబితా ప్రక్షాళన జరుగుతోందని వివరించారు. ఈ ప్రక్రియలో భాగంగా 2.8 కోట్ల మంది మరణించిన వారి పేర్లు, 1.2 కోట్ల డూప్లికేట్ ఓట్లు, 6.33 కోట్ల మంది వేరే ప్రాంతాలకు శాశ్వతంగా వలస వెళ్లిన వారి పేర్లు, మరో 3.01 కోట్ల మంది స్థానిక చిరునామాల్లో నివాసం లేని వారి వివరాలను మాత్రమే తొలగించడం జరిగిందన్నారు. క్షేత్రస్థాయిలో బీఎల్వోలు, వీఆర్వోలు రాష్ట్ర ప్రభుత్వ ఉద్యోగులేనని, వారు ఇంటింటికి వెళ్లి ఎంక్వైరీ చేసి చర్యలు తీసుకుంటుంటే దానిని కేంద్ర ప్రభుత్వానికి, బీజేపీకి ఎలా ఆపాదిస్తారని ప్రశ్నించారు. 2013లో కాంగ్రెస్ హయాంలో కేంద్ర న్యాయశాఖ మంత్రిగా ఉన్న కపిల్ సిబల్ రాజ్యసభలో స్వయంగా 13.5 లక్షల బోగస్ ఓట్లను తొలగించడాన్ని సమర్థించిన విషయాన్ని గుర్తుచేశారు. ఆధారాలుంటే అఫిడవిట్ రూపంలో ఈసీఐకి సమర్పించమని పిలిచినా వెళ్లకుండా, పార్లమెంట్‌లో చర్చించకుండా కేవలం మీడియా ఈవెంట్ల కోసం ఢిల్లీలో విధుల్లో ఉన్న మహిళా పోలీసులపై దురుసుగా ప్రవర్తిస్తూ రోడ్లపై డ్రామాలు ఆడుతున్నారని ఆగ్రహం వ్యక్తం చేశారు.

రాష్ట్రంలో కాంగ్రెస్ మంత్రులు, ఎమ్మెల్యేలు రోడ్లపైకి వచ్చి గంటల తరబడి ట్రాఫిక్ జామ్‌లు చేస్తూ ప్రజలను తీవ్ర ఇబ్బందులకు గురిచేస్తున్నారని సుభాష్ ఆగ్రహం వ్యక్తం చేశారు. ఎన్నికల సమయంలో ఇచ్చిన 6 గ్యారెంటీలు, 420 హామీలను అమలు చేయకుండా గాలికొదిలేసిన రేవంత్ రెడ్డి, తన వైఫల్యాల నుంచి ప్రజల దృష్టిని మళ్లించేందుకే ఢిల్లీ వెళ్లి ధర్నాలు చేస్తున్నారని విమర్శించారు. రైతుల కష్టాలు, సాగునీటి ఎద్దడి, విద్యుత్ ఛార్జీల పెంపు, నిరుద్యోగ యువత సమస్యలను గాలికొదిలేసి సీఎం రేవంత్ రెడ్డి రియల్ ఎస్టేట్ వ్యాపారంపై దృష్టి పెట్టారని మండిపడ్డారు.

ప్రజాస్వామ్యం గురించి, ఓటు హక్కు గురించి సీఎం రేవంత్ రెడ్డి ఢిల్లీకి వెళ్లి మాట్లాడటం విడ్డూరంగా ఉందని ఎన్.వి. సుభాష్ ఎద్దేవా చేశారు. అసలు ప్రజాస్వామ్యంలో ఓటు విలువను దిగజార్చి, ఓటు చోరీకి పాల్పడింది రేవంత్ రెడ్డేనని ఆరోపించారు. 2015లో 'ఓటుకు నోటు' కేసులో ఆడియో, వీడియో రికార్డింగులతో కెమెరాల సాక్షిగా అడ్డంగా దొరికిపోయి నేటికీ కోర్టుల చుట్టూ తిరుగుతున్న చరిత్ర రేవంత్ రెడ్డిదని గుర్తుచేశారు. అటువంటి వ్యక్తి నేడు 'సీట్ చోరీ, ఓటు చోరీ' అంటూ బీజేపీపై నిందలు వేయడం దయ్యాలు వేదాలు వల్లించినట్లు ఉందని మండిపడ్డారు.

కేసీఆర్ ఎర్రవల్లి ఫామ్‌హౌస్‌లో 45 ఎకరాల ప్రభుత్వ భూమి కబ్జాకు గురైందని గతంలో చెప్పిన రేవంత్ రెడ్డి, ఇప్పుడు ఎందుకు వెనక్కి తగ్గి మిన్నకుండిపోయారని ఎన్.వి. సుభాష్ ప్రశ్నించారు. పీసీసీ అధ్యక్షుడిగా ఉన్నప్పుడు ‘100 రోజుల్లో కేసీఆర్ కుటుంబ అవినీతిని బయటకు తీసి జైలుకు పంపుతాం’ అని ప్రగల్భాలు పలికిన రేవంత్ రెడ్డి.. అధికారంలోకి వచ్చాక కాళేశ్వరం, ఫోన్ ట్యాపింగ్, ధరణి, గొర్రెల కుంభకోణం, విద్యుత్ కొనుగోళ్లు సహా 20 కీలక స్కామ్‌లపై ఎందుకు చర్యలు తీసుకోవడం లేదని నిలదీశారు. సీఎం రేవంత్ రెడ్డి ఆదివారం వస్తే చాలు సెక్యూరిటీ లేకుండా స్వయంగా కారు నడుపుకుంటూ వెళ్లి విలువైన భూములు ఎక్కడున్నాయో చూసుకుని, రియల్ ఎస్టేట్ ఏజెంట్లు, సలహాదారులతో కలిసి ఎక్సెల్ షీట్లలో కబ్జా ప్లాన్లు వేస్తున్నారని తీవ్ర ఆరోపణలు చేశారు. కాంగ్రెస్, బీఆర్ఎస్ పార్టీలు పగలు కుస్తీ పడుతూ రాత్రిపూట దోస్తీ చేస్తూ ప్రజలను మోసం చేస్తున్నాయని ఆయన మండిపడ్డారు.

గతంలో బండి సంజయ్ కుమార్ గారు బీజేపీ రాష్ట్ర అధ్యక్షుడిగా ఉన్న సమయంలో కరీంనగర్ ఎంపీ కార్యాలయంలో శాంతియుతంగా దీక్ష చేస్తుంటే, నాటి బీఆర్ఎస్ ప్రభుత్వం కాంగ్రెస్ పార్టీ పరోక్ష మద్దతుతో గ్యాస్ కట్టర్లు, వెల్డింగ్ మిషన్లు తీసుకొచ్చి డోర్లు బద్దలుకొట్టి పాశవికంగా అరెస్ట్ చేసిన విషయాన్ని ఎన్.వి. సుభాష్ గుర్తుచేశారు. అలాగే ప్రస్తుత బీజేపీ రాష్ట్ర అధ్యక్షుడు శ్రీ ఎన్. రాంచందర్ రావు గారు ప్రజా సమస్యలపై వినతిపత్రాలు ఇచ్చేందుకు ప్రయత్నిస్తే స్పందించకపోగా ఒక్క నెలలోనే ఆరుసార్లు అరెస్ట్ చేశారని మండిపడ్డారు. కేంద్ర మంత్రి హోదాలో ఉన్న కిషన్ రెడ్డి గారు సింగరేణి ప్రాంతానికి వెళ్తే ప్రోటోకాల్ పాటించకుండా అడ్డుకుని అవమానించారని ఆగ్రహం వ్యక్తం చేశారు. తెలంగాణలో బీజేపీ నాయకులను ఇంతలా వేధించిన కాంగ్రెస్ నేతలు, నేడు ఢిల్లీ వీధుల్లోకి వెళ్లి ‘ప్రజాస్వామ్యం ప్రమాదంలో పడింది’ అని మాట్లాడటం హాస్యాస్పదమని దుయ్యబట్టారు. బీజేపీలో నిర్ణయాలు పారదర్శకంగా, క్రమశిక్షణతో ఉంటాయని సుభాష్ పేర్కొన్నారు. లీకులు ఇస్తూ అంతర్గత విభేదాలు సృష్టించే సంస్కృతి కాంగ్రెస్‌దే తప్ప బీజేపీకి లేదన్నారు. ప్రస్తుతం బీజేపీ రాష్ట్ర అధ్యక్షుడు శ్రీ ఎన్. రాంచందర్ రావు గారి నేతృత్వంలో పార్టీ శ్రేణులన్నీ ఒకే తాటిపై తెలంగాణలో బీజేపీని అధికారంలోకి తీసుకురావడమే లక్ష్యంగా పనిచేస్తున్నాయని స్పష్టం చేశారు.

రాహుల్ గాంధీ నాయకత్వంలో కాంగ్రెస్ పార్టీ ఇప్పటికే 99 ఎన్నికల్లో ఓడిపోయిందని సుభాష్ ఎద్దేవా చేశారు. కాంగ్రెస్ నేతలు ఆయనకు 'ఓటమి సెంచరీ' పూర్తి కాగానే గిన్నిస్ బుక్ రికార్డు లేదా ఆస్కార్ బిరుదు ఇస్తారేమోనని వ్యంగ్యాస్త్రాలు విసిరారు. ఎన్నికల్లో గెలిస్తే ఈవీఎంలు మంచివని, ఓడిపోతే మోదీ గారిపై, ఎన్నికల సంఘంపై నిందలు వేయడం కాంగ్రెస్‌కు అలవాటుగా మారిందన్నారు.