ప్రజల సమస్యలను నేరుగా తెలుసుకుని అధికారులతో మాట్లాడి పరిష్కరిస్తున్నాం: మంత్రి పొన్నం ప్రభాకర్

ప్రభుత్వం ఏర్పడిన తర్వాత రామంచ గ్రామంలో వివిధ సంక్షేమ, అభివృద్ధి కార్యక్రమాల ద్వారా గణనీయమైన ప్రగతి సాధించినట్లు అధికారులు వివరించారు.

➤గ్రామంలో 16 ఇందిరమ్మ ఇళ్లు మంజూరు కాగా, త్వరలో రెండో విడతలో మరిన్ని ఇళ్లు మంజూరు కానున్నాయి.
➤ 317 చేయూత పెన్షన్లు ఉండగా, కొత్తగా మరో 56 పెన్షన్లను గుర్తించారు.
➤402 కుటుంబాలకు గృహజ్యోతి పథకం కింద 200 యూనిట్ల వరకు ఉచిత విద్యుత్ అందుతోంది.
➤ అర్హులైన కుటుంబాలకు రూ.500కే గ్యాస్ సబ్సిడీ అందుతోంది.
➤ 50 మహిళా సంఘాలకు రూ.14.91 లక్షల సున్నా వడ్డీ రుణాలు అందించారు.
➤55 మహిళా సంఘాలకు రూ.9.37 కోట్ల బ్యాంకు లింకేజీ రుణాలు విడుదల చేశారు.
➤శ్రీనిధి కింద 5 మహిళా సంఘాలకు రూ.14.91 లక్షలు విడుదల చేశారు.
➤గ్రామంలోని 784 మంది మహిళలకు ఇందిరమ్మ చీరలు పంపిణీ చేశారు.
➤356 మంది రైతులకు రైతు రుణమాఫీ కింద రూ.2.97 కోట్లు విడుదల చేశారు.
➤811 మంది రైతులకు రైతుభరోసా కింద రూ.3.74 కోట్లు అందించారు.
➤రైతు బీమా కింద 10 మంది రైతుల కుటుంబాలకు రూ.50 లక్షల చెక్కులు అందించారు.
➤5 మంది రైతులకు సన్నవడ్ల బోనస్ కింద రూ.2.45 లక్షలు విడుదల చేశారు.
➤17 మందికి కళ్యాణలక్ష్మి చెక్కులు అందించారు.
➤84 కొత్త రేషన్ కార్డులు పంపిణీ చేసి, మరో 202 మంది పేర్లను రేషన్ కార్డుల్లో చేర్చారు.
➤715 రేషన్ కార్డులకు సన్నబియ్యం పంపిణీ చేస్తున్నారు.
➤భూభారతి కింద వచ్చిన 4,697 దరఖాస్తుల పరిష్కారానికి చర్యలు చేపట్టారు.

రామంచ గ్రామంలో వివిధ అభివృద్ధి పనులకు ప్రభుత్వం నిధులు కేటాయించింది.

- రూ.75 లక్షలతో వివిధ వార్డుల్లో అంతర్గత సీసీ రోడ్లు నిర్మించారు.
- MPPS పాఠశాలలో టాయిలెట్లు నిర్మించారు.
- రూ.10 లక్షలతో ZPHS పాఠశాల కాంపౌండ్ వాల్ నిర్మించారు.
- రూ.20 లక్షలతో గ్రామ పంచాయతీ భవనం మంజూరు చేశారు.
- రూ.12 లక్షలతో అంగన్‌వాడీ కేంద్రం నూతన భవనం నిర్మించారు.
- రూ.4 లక్షలతో ZPHS పాఠశాలలో టాయిలెట్లు నిర్మించారు.
- రూ.30 లక్షలతో మూడు V.O. భవనాలు నిర్మించారు.
- ఇప్పటివరకు గ్రామ అభివృద్ధికి మొత్తం రూ.5.24 కోట్లు ఖర్చు చేసినట్లు అధికారులు తెలిపారు.

గ్రామ సర్పంచ్ ఒంటెల కిషన్ రెడ్డి గ్రామంలోని పలు సమస్యలను మంత్రి దృష్టికి తీసుకువచ్చారు. ముఖ్యంగా చెరువుల మత్తడి నీరు వచ్చినప్పుడు రహదారులు ముంపునకు గురికాకుండా కల్వర్టులు నిర్మించాలని, ఎల్లమ్మ వైపు కల్వర్టు, రామంచ- నర్సింహులపల్లి - సీతారాంపూర్ బీటీ రోడ్డు, కొత్తపల్లి- రామంచ - రాజీవ్ రహదారి వైపు బీటీ రోడ్డు, పాఠశాలకు అదనపు తరగతి గదులు, రాజీవ్ రహదారి వైపు కమాన్ నిర్మాణం, లక్ష్మీ నరసింహస్వామి ఆలయాన్ని దేవాదాయ శాఖ ఆధ్వర్యంలో అభివృద్ధి చేయాలని కోరారు.

మూడు చెరువుల మత్తడి కలిసే ప్రాంతంలో కల్వర్టులు, రోడ్ల నిర్మాణానికి చర్యలు తీసుకుంటామని తెలిపారు. రామంచ నుంచి ములకనూరు వరకు ఆర్‌అండ్‌బీ రహదారికి రూ.3.60 కోట్లు మంజూరయ్యాయని, కొత్తపల్లి వరకు రహదారి పనులను పూర్తి చేస్తామని చెప్పారు.

రామంచ గ్రామంలోని పాఠశాలలో విద్యార్థుల సంఖ్య పెరిగి అదనపు తరగతి గదులు అవసరం కావడం సంతోషకరమైన విషయమని మంత్రి అన్నారు. పాఠశాలలకు అవసరమైన మౌలిక వసతులు కల్పించే బాధ్యత ప్రభుత్వానిదని, విద్యార్థులకు నాణ్యమైన విద్య అందించే బాధ్యత ఉపాధ్యాయులదని పేర్కొన్నారు.హుస్నాబాద్ నియోజకవర్గం చిగురుమామిడి మండల కేంద్రంలో తెలంగాణ పబ్లిక్ స్కూల్ మంజూరైందని, ఇటీవల ముఖ్యమంత్రి శంకుస్థాపన చేశారని తెలిపారు. మండలంలో విద్యార్థులకు ప్రతిరోజూ ఉదయం 2,280 మందికి అల్పాహారం అందిస్తున్నట్లు చెప్పారు.కరీంనగర్‌లో బ్రేక్‌ఫాస్ట్ కిచెన్ ప్రారంభించి నెల రోజులుగా విద్యార్థులకు నాణ్యమైన అల్పాహారం అందిస్తున్నామని మంత్రి తెలిపారు.

రామంచ గ్రామంలో 900 స్టీల్ బ్యాంక్ కిట్లు అందుబాటులో ఉన్నాయని, గ్రామ ప్రజలు ప్లాస్టిక్‌ను వినియోగించకుండా ప్రతి ఫంక్షన్‌లో స్టీల్ బ్యాంక్‌ను ఉపయోగించాలని మంత్రి సూచించారు. ప్లాస్టిక్ వినియోగాన్ని నియంత్రించేందుకు చర్యలు తీసుకుంటామని చెప్పారు. గ్రామంలోని ప్రతి ఒక్కరూ ఆరోగ్య పరీక్షలు చేయించుకోవాలని మంత్రి సూచించారు. గ్రామంలో మెగా హెల్త్ క్యాంప్ నిర్వహిస్తున్నట్లు తెలిపారు. 14 సంవత్సరాలు నిండిన ప్రతి బాలిక గర్భాశయ క్యాన్సర్ నివారణకు HPV టీకా వేయించుకోవాలని సూచించారు. ప్రతి ఒక్కరూ బీపీ, షుగర్ పరీక్షలు చేయించుకోవాలని, తలసేమియా వ్యాధిగ్రస్తులకు ప్రభుత్వం పెన్షన్ అందిస్తున్నట్లు తెలిపారు.పిల్లలకు సకాలంలో టీకాలు వేయించాలని, గర్భిణులు, బాలింతలు ఆరోగ్యంపై ప్రత్యేక శ్రద్ధ తీసుకోవాలని సూచించారు.

మహిళా సంఘాలకు వడ్డీలేని రుణాలు అందించడంతో పాటు, వారి రుణ పరిమితిని రూ.5 లక్షల నుంచి రూ.10 లక్షల వరకు పెంచే దిశగా ప్రభుత్వం చర్యలు తీసుకుంటోందని మంత్రి తెలిపారు. మహిళలకు ఉపాధి, స్వయం ఉపాధి అవకాశాలు కల్పించి ఆర్థికంగా బలోపేతం చేయడమే ప్రభుత్వ లక్ష్యమని పేర్కొన్నారు.