ఓటు హక్కును కాపాడుకోవడం ప్రతి ఒక్కరి బాధ్యత: ప్రజాస్వామ్య పరిరక్షణ పాదయాత్రలో ఎమ్మెల్యే నాయిని

ప్రజాస్వామ్యంలో అత్యంత కీలకమైన ఓటు హక్కును కాపాడుకోవాల్సిన బాధ్యత ప్రతి ఒక్కరిపై ఉందన్నారు. ఎన్నికల ప్రక్రియపై ప్రజల్లో అనుమానాలు తలెత్తేలా వ్యవహరించే ఎలాంటి చర్యలనైనా తీవ్రంగా వ్యతిరేకించాల్సిన అవసరం ఉందన్నారు.

ఎన్నికల వ్యవస్థపై వచ్చిన ఆరోపణలు, అభ్యంతరాలపై సమగ్ర విచారణ జరిపి వాస్తవాలను ప్రజల ముందుంచాలని డిమాండ్ చేశారు. ఓటర్ల జాబితాల్లో మార్పులు, ఓట్ల తొలగింపు, ఓటు హక్కుకు సంబంధించిన అంశాలపై ప్రజల్లో అనుమానాలు లేకుండా పారదర్శకమైన విధానం ఉండాలని అన్నారు.

కేంద్రంలోని బీజేపీ ప్రభుత్వం అధికారంలోకి రావడానికి ప్రజాస్వామ్య వ్యవస్థలను దుర్వినియోగం చేస్తోందంటూ ఎమ్మెల్యే ఆరోపించారు. ప్రజల ఓటు హక్కుపై దాడి జరిగితే కాంగ్రెస్ పార్టీ, ఇండియా కూటమి చూస్తూ ఊరుకోదని స్పష్టం చేశారు.

వరంగల్ ఎప్పుడూ ప్రజా ఉద్యమాలకు, చైతన్య కార్యక్రమాలకు ముందుంటుందని, ప్రజాస్వామ్య పరిరక్షణ కోసం చేపట్టిన ఈ యాత్రకు కూడా వరంగల్ నుంచే బలమైన నాంది పలికామని అన్నారు. ప్రజాస్వామ్యాన్ని కాపాడేందుకు అన్ని రాజకీయ పార్టీలు, ప్రజాసంఘాలు, మేధావులు, విద్యార్థులు ఐక్యంగా ముందుకు రావాలని పిలుపునిచ్చారు.

రాబోయే రోజుల్లో రాహుల్ గాంధీ నాయకత్వంలో ఇండియా కూటమి మరింత బలోపేతం అవుతుందని, తెలంగాణలో ముఖ్యమంత్రి రేవంత్ రెడ్డి నాయకత్వంలో కాంగ్రెస్ ప్రభుత్వం ప్రజల ఆశీర్వాదంతో ముందుకు సాగుతుందని నాయిని రాజేందర్ రెడ్డి అన్నారు.

ఈ కార్యక్రమంలో హుజురాబాద్ నియోజకవర్గ ఇంచార్జ్ ఓడితల ప్రణవ్, రాష్ట్ర కార్పొరేషన్ చైర్మన్ కుసూరు పాషా, సంఘ వెంకట్రాజం, KUDA చైర్మన్ గుండు సుధారాణి, లైబ్రరీ చైర్మన్ అజీజ్ ఖాన్, ఇండియా కూటమి నాయకులు సిపిఐ రాష్ట్ర సహాయ కార్యదర్శి తక్కలపల్లి శ్రీనివాసరావు, సిపిఎం జిల్లా కార్యదర్శి ప్రభాకర్ రెడ్డి, న్యూ డెమోక్రసీ జిల్లా కార్యదర్శి నున్న అప్పారావు, టీజేసీ అధ్యక్షులు జిల్లా రాజేంద్రప్రసాద్, సిపిఐ జిల్లా కార్యదర్శి బిక్షపతి,టీపీసీసీ ఉపాధ్యక్షులు బొద్దిరెడ్డి ప్రభాకర్ రెడ్డి, దుద్దిల శ్రీనివాస్ బాబు, ఈవీ శ్రీనివాసరావు, బత్తిని శ్రీనివాస్ రావు, యువజన విభాగం నాయకులు, కాంగ్రెస్ పార్టీ నాయకులు, కార్యకర్తలు, వివిధ కుల, మత సంఘాల నేతలు తదితరులు పాల్గొన్నారు.