మన సామాజిక వర్గం నుంచి ఎక్కువ మంది సివిల్ సర్వెంట్లు తయారయ్యేలా ప్రణాళికాబద్ధంగా కార్యాచరణ రూపొందించాలని మంత్రి సూచించారు. సివిల్ సర్వీసెస్‌కు సిద్ధమయ్యే విద్యార్థులకు నాణ్యమైన శిక్షణ అందించేందుకు కృషి చేయాలని, ఈ దిశగా ప్రభుత్వం తరఫున అవసరమైన సహకారం అందిస్తామని స్పష్టం చేశారు.
విద్యార్థులు, విద్యార్థినులకు సమాన అవకాశాలు కల్పిస్తూ, వారు ఉన్నత విద్యను అభ్యసించి అన్ని రంగాల్లో రాణించేలా ప్రోత్సహించాలని అన్నారు. తల్లిదండ్రులు తమ పిల్లల విద్యకు ప్రాధాన్యత ఇవ్వడంతో పాటు, ఉపాధ్యాయులు, ఉద్యోగులు, సమాజంలోని పెద్దలు విద్యార్థుల భవిష్యత్తు నిర్మాణంలో భాగస్వాములు కావాలని పిలుపునిచ్చారు.
విద్యార్థుల కోసం హాస్టళ్లు, వసతి గృహాలు, సత్రాలు నిర్మించేందుకు దాతలు ముందుకు రావాలని కోరారు. ఆర్థికంగా స్థిరపడిన వారు పేద విద్యార్థుల చదువుకు, పోటీ పరీక్షల కోచింగ్‌కు తమ వంతు సహకారం అందించాలని విజ్ఞప్తి చేశారు. ప్రభుత్వం, దాతలు, సంఘాల సమష్టి కృషితో విద్యార్థులకు మెరుగైన విద్యా అవకాశాలు కల్పించవచ్చని తెలిపారు.
గౌడ సంఘం ఉద్యోగులందరూ జిల్లా స్థాయిలో సమన్వయంతో పనిచేస్తూ, సంఘటితంగా ముందుకు సాగాలని మంత్రి సూచించారు. ఉద్యోగుల వివరాలను సమీకరించి, నిరుద్యోగ యువతకు ఉద్యోగ నోటిఫికేషన్లకు అనుగుణంగా శిక్షణ అందించేలా కార్యాచరణ రూపొందించాలని అన్నారు.
గతంలో పెద్దలు చేసిన సేవలను స్ఫూర్తిగా తీసుకుని, వారి కృషిని మరింత ముందుకు తీసుకెళ్లేలా కొత్త కార్యక్రమాలు చేపట్టాలని మంత్రి పొన్నం ప్రభాకర్ పిలుపునిచ్చారు. విద్యార్థుల విద్యాభివృద్ధి, వసతి సౌకర్యాల కల్పన, యువతకు శిక్షణ వంటి కార్యక్రమాల్లో ప్రతి ఒక్కరూ బాధ్యతతో భాగస్వాములు కావాలని ఆకాంక్షించారు.
