మహాత్మా గాంధీ దేశానికి సత్యం, అహింస, శాంతి, ఐక్యత మార్గాలను చూపించిన మహనీయుడని అన్నారు. ప్రజలందరూ ఐక్యంగా ఉంటే ఎలాంటి లక్ష్యాన్నైనా సాధించగలమనే నమ్మకాన్ని గాంధీజీ దేశ ప్రజల్లో కల్పించారని పేర్కొన్నారు.
దేశ స్వాతంత్య్రం కోసం గాంధీజీ చేసిన పోరాటం, ఆయన చేసిన సేవలు, త్యాగాలు భారత ప్రజల గుండెల్లో చిరస్థాయిగా నిలిచిపోయాయని అన్నారు. గాంధీజీ చూపించిన మార్గం వల్లనే ప్రజలందరినీ ఒకే తాటిపైకి తీసుకువచ్చి స్వాతంత్య్ర ఉద్యమాన్ని విజయవంతం చేయగలిగామని తెలిపారు.
అయితే ప్రస్తుతం బీజేపీ పార్టీ గాంధీజీని తక్కువ చేసి చూపించే విధంగా ప్రచారం చేయడం సరైన పద్ధతి కాదని ఎమ్మెల్యే నాయిని అన్నారు. గాంధీజీ విగ్రహాలకు నివాళులు అర్పిస్తూ మరోవైపు సోషల్ మీడియా, యూట్యూబ్ వంటి వేదికలలో గాంధీ కంటే గాడ్సే గొప్పవారిగా చూపించే ప్రయత్నాలు చేయడం సరికాదని పేర్కొన్నారు. దేశం కోసం గాంధీజీ చేసిన త్యాగాలు, సేవలను ఎవరెన్ని విధాలుగా ప్రచారం చేసినా చరిత్ర నుంచి చెరిపివేయడం సాధ్యం కాదన్నారు.
గాంధీజీ కుటుంబం దేశం కోసం చేసిన త్యాగాలను కూడా ప్రతి ఒక్కరూ గుర్తు చేసుకోవాలని అన్నారు. దేశం కోసం సేవ చేసిన ఆ కుటుంబం వ్యక్తిగత ఆస్తులు, సంపద కోసం ఎన్నడూ పోరాటం చేయలేదని, దేశ ప్రయోజనాలకే తమ జీవితాలను అంకితం చేశారని పేర్కొన్నారు. అలాంటి మహనీయుల కుటుంబాలను ఆదర్శంగా తీసుకుని, సమాజానికి ఉపయోగపడే విధంగా మనమంతా పనిచేయాలని పిలుపునిచ్చారు.
దేశం కోసం త్యాగాలు చేసిన మహనీయుల చరిత్రను భావితరాలకు తెలియజేయాల్సిన బాధ్యత ప్రతి ఒక్కరిపై ఉందన్నారు. గాంధీజీ ఆశయాలైన సత్యం, అహింస, సామాజిక సమానత్వం, దేశ ఐక్యతను కాపాడేందుకు ప్రతి ఒక్కరూ కృషి చేయాలని ఎమ్మెల్యే నాయిని రాజేందర్ రెడ్డి సూచించారు.
