ప్రజావాణి దరఖాస్తులపై తక్షణ చర్యలు తీసుకోవాలి: బల్దియా కమిషనర్ టి. వెంకన్న

గత వారం ప్రజావాణిలో స్వీకరించిన దరఖాస్తుల పరిష్కార పురోగతిని కమిషనర్ విభాగాల వారీగా సమీక్షించారు. ఇంకా పెండింగ్‌లో ఉన్న ఫిర్యాదులను తక్షణమే పరిష్కరించడంతో పాటు, తీసుకున్న చర్యలు, పరిష్కార వివరాలను సంబంధిత ఫిర్యాదుదారులకు తెలియజేయాలని అధికారులను ఆదేశించారు.

ప్రజల సమస్యలను కేవలం దరఖాస్తులుగా కాకుండా, పౌరుల సమస్యలకు పరిష్కారం అందించాల్సిన బాధ్యతగా అధికారులు భావించాలని సూచించారు. ఫిర్యాదుల పరిష్కారంలో నిర్లక్ష్యం లేదా అనవసర జాప్యం చోటుచేసుకుంటే సంబంధిత అధికారులు బాధ్యత వహించాల్సి ఉంటుందని కమిషనర్ స్పష్టం చేశారు.

- టౌన్ ప్లానింగ్: 32
- ఇంజినీరింగ్: 28
- ఆరోగ్యం, పారిశుద్ధ్యం: 09
- రెవెన్యూ: 09
- నీటి సరఫరా: 03
- మొత్తం: 81 దరఖాస్తులు

ప్రజావాణి అనంతరం అధికారులతో కమిషనర్ మాట్లాడుతూ.. బతుకమ్మ, దసరా పండుగల సందర్భంగా ప్రజలకు ఎలాంటి అసౌకర్యం కలగకుండా గతంలో మాదిరిగా సమగ్ర ఏర్పాట్లు చేపట్టాలని ఆదేశించారు. పండుగల నేపథ్యంలో ప్రజల రద్దీ, ప్రధాన కార్యక్రమాలు జరిగే ప్రాంతాలను దృష్టిలో ఉంచుకుని పారిశుద్ధ్యం, తాగునీరు, విద్యుత్, రహదారుల మరమ్మతులు, వెలుగుల ఏర్పాటు తదితర మౌలిక సదుపాయాలను ముందస్తుగా సిద్ధం చేయాలని సూచించారు.

అన్ని విభాగాల అధికారులు పరస్పర సమన్వయంతో పనిచేస్తూ, పండుగల సమయంలో ఎలాంటి ఇబ్బందులు తలెత్తకుండా ముందస్తు ప్రణాళికతో చర్యలు చేపట్టాలని కమిషనర్ పేర్కొన్నారు. ప్రజలు పండుగలను ఆహ్లాదకరమైన, ప్రశాంతమైన వాతావరణంలో జరుపుకునేలా బల్దియా తరఫున అవసరమైన అన్ని ఏర్పాట్లు పూర్తి చేయాలని ఆదేశించారు.

ఇందిరమ్మ ఇళ్లకు సంబంధించిన వెరిఫికేషన్ ప్రక్రియను త్వరితగతిన పూర్తి చేయాలని సంబంధిత అధికారులు, సిబ్బందిని కమిషనర్ ఆదేశించారు. దరఖాస్తుల పరిశీలన, క్షేత్రస్థాయి వెరిఫికేషన్ ప్రక్రియను సమన్వయంతో చేపట్టి, పెండింగ్ లేకుండా నిర్ణీత సమయంలో పూర్తి చేయాలని సూచించారు. అర్హులైన లబ్ధిదారులకు ప్రభుత్వ పథకం ప్రయోజనాలు సకాలంలో అందేలా అధికారులు బాధ్యతతో వ్యవహరించాలని కమిషనర్ అన్నారు.

ఈ కార్యక్రమంలో అదనపు కమిషనర్ జోనా, సూపరింటెండింగ్ ఇంజినీర్ రాజ్‌కుమార్, డీఎఫ్‌ఓ శంకర్‌లింగం, సీహెచ్‌ఓ లక్ష్మారెడ్డి, డిప్యూటీ కమిషనర్లు ప్రసన్నరాణి, సమ్మయ్య, సెక్రటరీ అనిల్‌బాబులతో పాటు వివిధ విభాగాల అధికారులు, సిబ్బంది పాల్గొన్నారు.