పొగాకు వినియోగంపై ఉక్కుపాదం మోపాలి: జిల్లా కలెక్టర్ సందీప్ కుమార్ ఝా

పాఠశాలలు, కళాశాలల్లో పొగాకు ఉత్పత్తుల దుష్ప్రభావాలపై పోస్టర్లు రూపొందించి, విస్తృతంగా ప్రచారం చేయాలని, విద్యార్థుల ప్రవర్తనలో వచ్చే మార్పులను ఉపాధ్యాయులు ఎప్పటికప్పుడు గమనించాలని, అనుమానాస్పద పరిస్థితులు గుర్తించినప్పుడు వెంటనే సంబంధిత అధికారుల దృష్టికి తీసుకెళ్లి అవసరమైన చర్యలు చేపట్టాలని సూచించారు.

విద్యార్థులు పొగాకు ఉత్పత్తుల బారిన పడకుండా తల్లిదండ్రులు కూడా తమ పిల్లల ప్రవర్తన, స్నేహితుల పరిచయాలు, రోజువారీ కార్యకలాపాలపై ప్రత్యేక శ్రద్ధ వహించాలని తెలిపారు.

బహిరంగ ప్రదేశాల్లో ధూమపానం చేసే వారిపై నిబంధనల ప్రకారం జరిమానాలు విధించాలని ఆదేశించారు. సిగరెట్లు, ఇతర పొగాకు ఉత్పత్తుల చట్టం (COTPA–2003), ఎలక్ట్రానిక్ సిగరెట్ల నిషేధ చట్టం (PECA–2019) నిబంధనల ప్రకారం విద్యా సంస్థల పరిసరాల్లో పొగాకు విక్రయాలు జరగకుండా కట్టుదిట్టమైన నిఘా ఏర్పాటు చేయాలని ఆదేశించారు.

పొగాకు ఉత్పత్తుల నియంత్రణ, నిర్మూలన కోసం పోలీస్, విద్యా శాఖ, ఎక్సైజ్ శాఖలతో పాటు సంబంధిత ఇతర శాఖలు సమన్వయంతో పని చేయాలని సూచించారు. పొగాకు రహిత సమాజ నిర్మాణానికి కృషి చేయాలని పిలుపునిచ్చారు.

విద్యార్థుల బంగారు భవిష్యత్తును కాపాడటం, యువతను పొగాకు ఉత్పత్తుల మహమ్మారి నుంచి రక్షించడం అందరి బాధ్యత అని, అన్ని గ్రామాలను, విద్యాసంస్థలను పొగాకు రహిత గ్రామాలుగా, విద్యాసంస్థలుగా తీర్చిదిద్దేందుకు ప్రతి ఒక్కరూ భాగస్వాములు కావాలని స్పష్టం చేశారు.

ఈ సమావేశంలో డీఎంహెచ్ఓ వాణి శ్రీ, ప్రోగ్రామ్ అధికారి మల్లిఖార్జున రావు, మునిసిపల్ కమిషనర్ రాజశేఖర్ రెడ్డి, డీఐఈఓ జితేందర్ రెడ్డి, బీసీ సంక్షేమ శాఖ అధికారి నరసింహ రావు, ఏసిపి భీం శర్మ, ఇతర వైద్యాధికారులు, సంబంధిత అధికారులు, తదితరులు పాల్గొన్నారు.