ప్రజాస్వామ్య పరిరక్షణ కోసం రాహుల్ గాంధీ నాయకత్వంలో అలుపెరగని పోరాటం

గత 12 ఏళ్లుగా కేంద్రంలోని బీజేపీ ప్రభుత్వం అధికార వ్యవస్థలను రాజకీయ ప్రయోజనాల కోసం ఉపయోగించుకుంటోందని మంత్రి విమర్శించారు. మొదట సీబీఐ, ఈడీ వంటి సంస్థలను అడ్డం పెట్టుకుని ప్రతిపక్షాలను ఇబ్బందులకు గురిచేశారని, ఇప్పుడు ఎన్నికల కమిషన్‌ను కూడా అదే తరహాలో ఉపయోగించుకుంటున్నారని ఆరోపించారు. ప్రధాన ఎన్నికల కమిషనర్ జ్ఞానేష్ కుమార్ వ్యవహారశైలి స్వతంత్రంగా వ్యవహరించాల్సిన రాజ్యాంగ సంస్థ ప్రతిష్ఠకు భంగం కలిగించేలా ఉందని, ఆయన బీజేపీ కార్యకర్తలా పనిచేస్తున్నారనే భావన ప్రజల్లో కలుగుతోందని అన్నారు.

ఎన్నికల కమిషన్‌లో నిర్ణయాలు, భిన్నాభిప్రాయాలపై కూడా పారదర్శకత ఉండాలని మంత్రి పేర్కొన్నారు. ఎన్నికల వ్యవస్థపై ప్రజలకు నమ్మకం కలిగించాల్సిన బాధ్యత కమిషన్‌పైనే ఉందని, ఆ నమ్మకం దెబ్బతింటే ప్రజాస్వామ్య వ్యవస్థకే నష్టం జరుగుతుందని స్పష్టం చేశారు.

ఓటర్ల జాబితాల నుంచి పెద్ద సంఖ్యలో ఓట్లు తొలగిస్తున్నారంటూ వస్తున్న ఆరోపణలపై దేశవ్యాప్తంగా చర్చ జరగాలని మంత్రి అన్నారు. దేశంలో 13 కోట్ల ఓట్లు తొలగించారన్న ఆరోపణలను ప్రస్తావిస్తూ, అర్హులైన ఒక్క ఓటరికి కూడా అన్యాయం జరగకూడదని, ప్రతి ఓటు విలువను కాపాడాలని డిమాండ్ చేశారు. దళితులు, మైనార్టీలు, పేదలు సహా అన్ని వర్గాల ప్రజల ఓటు హక్కుకు రక్షణ కల్పించాల్సిన అవసరం ఉందన్నారు.

పశ్చిమ బెంగాల్‌లో మమతా బెనర్జీ, తమిళనాడులో ఎం.కె. స్టాలిన్ ఓటమి రాజకీయ పరిణామాలను ప్రస్తావిస్తూ, ఎన్నికల ప్రక్రియపై అనుమానాలు, ఓటు చోరీ ఆరోపణలు ప్రజల్లో ఆందోళన కలిగిస్తున్నాయని పేర్కొన్నారు. ఎన్నికలు స్వేచ్ఛగా, నిష్పక్షపాతంగా జరిగేలా చూడాల్సిన బాధ్యత ఎన్నికల కమిషన్‌పై ఉందని గుర్తుచేశారు.

నల్లధనాన్ని వెనక్కి తీసుకొచ్చి ప్రతి ఒక్కరి ఖాతాలో రూ.15 లక్షలు వేస్తామని, ఏటా రెండు కోట్ల ఉద్యోగాలు కల్పిస్తామని ఇచ్చిన హామీలను నెరవేర్చడంలో మోదీ ప్రభుత్వం విఫలమైందని మంత్రి విమర్శించారు. ప్రజల అసలు సమస్యలపై దృష్టి సారించకుండా కుల, మతాల మధ్య చిచ్చుపెట్టి రాజకీయ లబ్ధి పొందే ప్రయత్నాలు చేస్తోందని ఆరోపించారు. మూడోసారి అధికారంలోకి రావడానికి కూడా అధికార సంస్థలను, దర్యాప్తు సంస్థలను ఉపయోగించుకున్నారంటూ విమర్శలు గుప్పించారు.

ప్రతిపక్ష నేతలపై అక్రమ అరెస్టులు, కేసుల పేరుతో ఒత్తిడి తీసుకురావడం ద్వారా ప్రజల తరఫున ప్రశ్నించే గొంతులను అణచివేయాలని చూస్తున్నారని అన్నారు. ప్రజాస్వామ్యంలో అధికారంలో ఉన్నవారిని ప్రశ్నించడం తప్పు కాదని, ప్రశ్నించే హక్కే ప్రజాస్వామ్యానికి అసలైన బలమని పేర్కొన్నారు.

ప్రధాన ఎన్నికల కమిషనర్ జ్ఞానేష్ కుమార్‌పై తమ అభ్యంతరాలు, డిమాండ్లు నెరవేరే వరకు రాహుల్ గాంధీ నాయకత్వంలో పోరాటం కొనసాగుతుందని మంత్రి కోమటిరెడ్డి వెంకట్ రెడ్డి స్పష్టం చేశారు. తెలంగాణ నుంచి పెద్ద సంఖ్యలో నాయకులు ఢిల్లీకి వచ్చి ఈ ఉద్యమంలో పాల్గొనడం ప్రజాస్వామ్య పరిరక్షణ పట్ల తమ నిబద్ధతకు నిదర్శనమన్నారు.

“ఇది కాంగ్రెస్ పార్టీ కోసం చేస్తున్న పోరాటం కాదు.. రేపటి తరాల భవిష్యత్తు కోసం, ప్రతి పౌరుడి ఓటు హక్కు కోసం, దేశ ప్రజాస్వామ్యాన్ని కాపాడటం కోసం చేస్తున్న పోరాటం. ఒక పేదవాడి ఓటైనా, ఒక దళితుడి ఓటైనా, ఒక మైనార్టీ ఓటైనా.. ప్రతి ఓటుకు సమానమైన విలువ ఉండాలి. ప్రజల తీర్పును ప్రభావితం చేసే ప్రయత్నాలను దేశం సహించదు”* అని మంత్రి పేర్కొన్నారు.

ప్రజల హక్కుల పరిరక్షణలో వెనక్కి తగ్గే ప్రసక్తే లేదని, రాజ్యాంగ విలువలను కాపాడేందుకు కాంగ్రెస్ పార్టీ, ఇండియా కూటమి ప్రజలతో కలిసి పోరాడుతాయని చెప్పారు. దేశానికి ప్రజాస్వామ్య విలువలను గౌరవించే, ప్రజల సమస్యలకు జవాబుదారీగా ఉండే నాయకత్వం అవసరమని, రాహుల్ గాంధీ నాయకత్వంలో ప్రజాస్వామ్య పరిరక్షణ ఉద్యమం మరింత బలోపేతం అవుతుందని ఆశాభావం వ్యక్తం చేశారు.