మోపాల్(రైట్స్ మీడియా): మూతపడిన ఎన్సీఎస్ఎఫ్ (NCSF) సారంగాపూర్ చక్కెర ఫ్యాక్టరీని వెంటనే తెరిపించి, దానిని బెల్లం తయారీ కేంద్రంగా మార్చి ప్రభుత్వమే స్వయంగా నడిపించాలని డిమాండ్ చేస్తూ చెరుకు ఉత్పత్తిదారుల సంఘం ఆధ్వర్యంలో రైతులు భారీ ట్రాక్టర్ ర్యాలీ నిర్వహించారు. మోపాల్ తహసీల్దార్ కార్యాలయం వరకు ర్యాలీగా వెళ్లిన రైతులు, అనంతరం తహసీల్దార్కు వినతిపత్రం సమర్పించారు.
ఈ సందర్భంగా చెరుకు ఉత్పత్తిదారుల సంఘం కన్వీనర్ ఆకుల పాపయ్య, దుపల్లి లక్ష్మారెడ్డి, తాడేం రాజారెడ్డి, పోచారం సంతోష్ మాట్లాడారు. ఒకనాడు మంచి లాభాలతో నడిచిన సారంగాపూర్ చక్కెర ఫ్యాక్టరీ వల్ల ప్రాంతీయ రైతులు ఎంతో ఆర్థికాభివృద్ధి సాధించారని తెలిపారు. పిల్లల చదువులు, ఇండ్ల నిర్మాణం, పెళ్లిళ్లు తదితర శుభకార్యాలకు ఈ ఫ్యాక్టరీ ఎంతో తోడ్పడిందని గుర్తుచేసుకున్నారు. కేంద్ర ప్రభుత్వ చక్కెర పాలసీలతో పాటు అవినీతి అధికారుల మూలంగానే ఫ్యాక్టరీ నష్టాల్లో కూరుకుపోయి మూతపడిందని, దీనిని తిరిగి తెరిపించే బాధ్యత రేవంత్ రెడ్డి ప్రభుత్వంపైనే ఉందని స్పష్టం చేశారు.
ఈ ప్రాంతంలోని 80 గ్రామాల రైతులు చెరుకు పండించేందుకు సిద్ధంగా ఉన్నారని, రైతులకు లాభసాటి ధర చెల్లించడంతో పాటు ఉచితంగా విత్తనాలు అందించి ప్రభుత్వం ప్రోత్సహించాలని కోరారు. గతంలో తులాం బంగారం ధర రూ.100 ఉన్న సమయంలోనే రైతులు ఫ్యాక్టరీ కోసం రూ.100 సభ్యత్వ రుసుము చెల్లించి, పెద్ద ఎత్తున నిధులు సమకూర్చడం ద్వారానే ఈ ఫ్యాక్టరీ ఏర్పడిందని వివరించారు.
పీసీసీ ప్రెసిడెంట్, ఎమ్మెల్సీ బొమ్మ మహేష్ కుమార్ గౌడ్, ప్రభుత్వ సలహాదారు సుదర్శన్ రెడ్డి, నిజామాబాద్ రూరల్ ఎమ్మెల్యే భూపతి రెడ్డిలు ఫ్యాక్టరీ పునరుద్ధరణపై సానుకూలంగా ఉన్నారని, ఈ విషయమై ముఖ్యమంత్రి రేవంత్ రెడ్డితో మాట్లాడతానని హామీ ఇచ్చారని తెలిపారు. ప్రస్తుతం ఎల్-నినో ప్రభావం కారణంగా ఆరుతడి పంటల వైపు వెళ్లాలని ప్రభుత్వం చెబుతున్నందున, తక్కువ నీటితో పండే చెరుకు పంటను ప్రోత్సహించాలని కోరారు. మార్కెట్లో ప్రస్తుతం బెల్లానికి మంచి డిమాండ్ ఉన్నందున, సారంగాపూర్ చక్కెర ఫ్యాక్టరీని బెల్లం కేంద్రంగా మార్చి, దానికి రూ.100 కోట్లు కేటాయించాలని నిరసనకారులు డిమాండ్ చేశారు.
ఈ కార్యక్రమంలో మున్నూరు కాపు సంఘం జిల్లా కార్యదర్శి కొట్టె గంగాధర్, ఎఫ్పీఓ (FPO) చైర్మన్ అగ్గు చిన్నయ్య, గంగాధర్, కె. జనార్దన రెడ్డి, సాయినాథ్తో పాటు దాదాపు 30 మంది రైతులు పాల్గొన్నారు.
