స్నేహ సొసైటీ సేవలు అభినందనీయం: పండిత్ దీన్ దయాల్ జయంతి వేడుకల్లో నగర మేయర్ ఉమారాణి, నుడా చైర్మన్ కేశవేణు

1995లో ప్రారంభమైన స్నేహ సొసైటీ నాటి నుండి నేటి వరకు ఎన్నో ఒడిదుడుకులను ఎదుర్కొని దివ్యాంగ విద్యార్థుల ఉన్నతికి కృషి చేస్తుందన్నారు. ఈ ఘనత వ్యవస్థాపకులు ఎస్. సిద్ధయ్య, జ్యోతి దంపతులకే దక్కుతుందని ప్రశంసించారు. అంధ, మానసిక దివ్యాంగ విద్యార్థుల్లో ధైర్యాన్ని నింపుతూ వారి బంగారు భవిష్యత్తుకు బాటలు వేస్తున్నారని తెలిపారు. ఇక్కడి విద్యార్థులు జాతీయ, అంతర్జాతీయ స్థాయిలో రాణించి జిల్లాకు మంచి పేరు తెచ్చారని కొనియాడారు.

కంటిచూపు లేనప్పటికీ స్పర్శ ద్వారా పండిత్ దీన్ దయాల్ జీవిత చరిత్రను లూయీ బ్రెయిలీ లిపి ద్వారా చదివి వివరించడం, సాంస్కృతిక నృత్యాలు, పాటలు మరియు యోగా ప్రదర్శనలు చేయడం అద్భుతమని కొనియాడారు. విద్యార్థులను ఈ స్థాయిలో తీర్చిదిద్దుతున్న స్నేహ సొసైటీ నిర్వాహకులను, ఉపాధ్యాయ సిబ్బందిని వారు అభినందించారు.
ఈ కార్యక్రమంలో పలు ప్రైవేట్ పాఠశాలల విద్యార్థులు సైతం ప్రదర్శనలు నిర్వహించారు. అనంతరం విచ్చేసిన ముఖ్య అతిథులను స్నేహ సొసైటీ యాజమాన్యం శాలువాలు, జ్ఞాపికలతో ఘనంగా సన్మానించింది.

ఈ కార్యక్రమంలో స్నేహ సొసైటీ కార్యదర్శి ఎస్. సిద్ధయ్య, ప్రిన్సిపాల్ జ్యోతి, అంధుల ప్రత్యేక పాఠశాలల ఉపాధ్యాయ సిబ్బంది, ప్రైవేట్ పాఠశాలల ప్రతినిధులు తదితరులు పాల్గొన్నారు.