జమ్మూకశ్మీర్ పై ఓఐసీ చేసిన వ్యాఖ్యలను తీవ్రంగా ఖండించిన భారత్

జమ్మూకశ్మీర్, లడఖ్ కేంద్రపాలిత ప్రాంతాలు ఎప్పటికీ భారతదేశంలో అంతర్భాగమని, విడదీయరాని భాగాలని విదేశాంగ శాఖ పునరుద్ఘాటించింది. రాజకీయ ప్రేరేపిత ప్రచారాలతో ఈ వాస్తవాన్ని ఎవరూ మార్చలేరని తెలిపింది. పాకిస్తాన్ చేసే కుట్రపూరిత ప్రచారాలను పదేపదే సమర్థించడం ద్వారా ఓఐసీ తన విశ్వసనీయతనే స్వయంగా ప్రశ్నించేలా చేసుకుంటోందని పేర్కొంది.

పాకిస్తాన్ చేస్తున్న కల్పిత ప్రచారాలకు వేదిక కల్పించడం మాని, ఉగ్రవాదాన్ని ప్రోత్సహిస్తున్న పాకిస్తాన్ కు హితవు పలకాలని ఓఐసీకి భారత్ సూచించింది. ఉగ్రవాదానికి మద్దతునివ్వడం, ఆర్థిక సాయం అందించడంలో పాకిస్తాన్ చరిత్ర ప్రపంచం మొత్తానికి స్పష్టంగా తెలుసని గుర్తుచేసింది. తన ఆధీనంలోని భూభాగాల నుంచి వెలువడుతున్న నిరంతర ఉగ్రవాద ముప్పును అరికట్టడంపై పాకిస్తాన్ దృష్టి పెట్టేలా ఓఐసీ మార్గనిర్దేశం చేస్తే బాగుంటుందని సమాధానమిచ్చింది.