నేర నియంత్రణపై ప్రత్యేక దృష్టి.. పెండింగ్ కేసుల దర్యాప్తు వేగవంతం చేయాలి

నల్గొండ జిల్లాలో నేర నియంత్రణకు మరింత సమర్థవంతంగా పనిచేయడంతోపాటు పెండింగ్ కేసుల దర్యాప్తును వేగవంతం చేయాలని జిల్లా ఎస్పీ శరత్ చంద్ర పవార్ పోలీసు అధికారులను ఆదేశించారు. నేరాల నివారణ, కేసుల దర్యాప్తు పురోగతి, సాంకేతిక పరిజ్ఞానం వినియోగం తదితర అంశాలపై సోమవారం నిర్వహించిన నేర సమీక్ష సమావేశంలో ఆయన పలు సూచనలు చేశారు. జిల్లాలో నమోదవుతున్న నేరాల తీరును, వివిధ కేసుల దర్యాప్తు పురోగతిని ఎస్పీ సమీక్షించారు. ప్రతి కేసులో నాణ్యమైన దర్యాప్తు చేపట్టి, నిందితులకు శిక్ష పడేలా పక్కా ఆధారాలను సేకరించాలని సూచించారు. పెండింగ్ కేసులను నిర్ణీత కాలవ్యవధిలో పరిష్కరించడంతోపాటు దర్యాప్తులో నాణ్యతకు ప్రాధాన్యం ఇవ్వాలని స్పష్టం చేశారు. కేసుల దర్యాప్తును శాస్త్రీయంగా, పారదర్శకంగా నిర్వహించేందుకు ‘ఈ-సాక్ష్య’ అనువర్తనాన్ని ప్రతి దర్యాప్తు అధికారి తప్పనిసరిగా వినియోగించాలని ఆదేశించారు. సేకరించిన ఆధారాలను పద్ధతిగా భద్రపరచి, భవిష్యత్తులో ఎలాంటి సందేహాలకు తావులేకుండా దర్యాప్తును పటిష్ఠం చేయాలన్నారు.

పోలీస్‌స్టేషన్లలో రికార్డుల నిర్వహణ, కేసుల వివరాల నమోదు, దర్యాప్తు పురోగతితోపాటు నేర, నేరస్తుల సమాచార వ్యవస్థ (సీసీటీఎన్‌ఎస్), ఈ-సాక్ష్య వంటి సాంకేతిక వ్యవస్థలను సమర్థంగా ఉపయోగించుకోవాలని సూచించారు. నేరం జరిగిన తర్వాత స్పందించడమే కాకుండా ముందస్తు నివారణ చర్యలపై ప్రత్యేక దృష్టి సారించాలని ఎస్పీ పేర్కొన్నారు. పాత నేరస్తులు, అనుమానాస్పద వ్యక్తుల కదలికలపై నిరంతరం నిఘా ఉంచాలని, అనుమానాస్పద కార్యకలాపాలపై తక్షణమే స్పందించాలని ఆదేశించారు. సమస్యాత్మక ప్రాంతాలు, నేరాలు జరిగే అవకాశం ఉన్న ప్రదేశాలను గుర్తించి బీట్ పోలీసింగ్‌ను మరింత బలోపేతం చేయాలని తెలిపారు. నేరాల ఛేదనలో సీసీ కెమెరాలు కీలక ఆధారాలుగా నిలుస్తున్నందున పట్టణాలు, ప్రధాన కూడళ్లు, రద్దీ ప్రాంతాలు, ముఖ్య రహదారులు, నేరాలకు అవకాశం ఉన్న ప్రదేశాల్లో వాటి ఏర్పాటును విస్తరించాలని సూచించారు. ప్రజలు, వ్యాపార సంస్థలు, స్థానిక సంస్థల సహకారంతో మరిన్ని ప్రాంతాల్లో కెమెరాలు ఏర్పాటు చేసేలా చర్యలు తీసుకోవాలన్నారు. ఇప్పటికే ఉన్న కెమెరాలు నిరంతరం పనిచేసేలా పర్యవేక్షిస్తూ సాంకేతిక లోపాలను వెంటనే సరిచేయాలని ఆదేశించారు. పెరుగుతున్న సైబర్ నేరాల నియంత్రణకు ప్రత్యేక కార్యాచరణ చేపట్టాలని ఎస్పీ సూచించారు. మోసాలపై ప్రజలకు విస్తృత అవగాహన కల్పించడంతోపాటు ఫిర్యాదు అందిన వెంటనే స్పందించాలని ఆదేశించారు.

బాధితుల ఖాతాల నుంచి నగదు ఇతర ఖాతాలకు బదిలీ కాకుండా సత్వర చర్యలు తీసుకుని, సాధ్యమైనంత త్వరగా నష్టాన్ని నివారించాలని తెలిపారు. మాదకద్రవ్యాల అక్రమ రవాణా, విక్రయం, వినియోగంపై నిరంతర నిఘా కొనసాగించాలని సూచించారు. సరఫరా గొలుసును గుర్తించి అక్రమ కార్యకలాపాలకు పాల్పడుతున్న వారిపై కఠిన చర్యలు తీసుకోవాలన్నారు. యువత మాదకద్రవ్యాల బారిన పడకుండా పాఠశాలలు, కళాశాలలు, గ్రామాలు, పట్టణాల్లో అవగాహన కార్యక్రమాలను విస్తృతంగా నిర్వహించాలని ఆదేశించారు. జిల్లా సరిహద్దుల్లో అక్రమ రవాణా, ఇసుక అక్రమ తవ్వకాలు, ప్రజా పంపిణీ వ్యవస్థ బియ్యం, ఇతర నిత్యావసర వస్తువుల అక్రమ తరలింపులకు అడ్డుకట్ట వేయాలని ఎస్పీ ఆదేశించారు. సరిహద్దుల మీదుగా రాకపోకలు సాగించే వాహనాలను నిరంతరం తనిఖీ చేస్తూ అనుమానాస్పద వాహనాలు, వ్యక్తుల కదలికలపై ప్రత్యేక నిఘా ఉంచాలని సూచించారు.

పోలీస్‌స్టేషన్‌కు వచ్చే ప్రజల సమస్యలను సానుకూలంగా విని, చట్టపరిధిలో సాధ్యమైనంత త్వరగా పరిష్కారం చూపాలని ఎస్పీ అన్నారు. బాధితుల ఫిర్యాదులపై నిర్లక్ష్యం వహించకుండా బాధ్యతాయుతంగా వ్యవహరించాలని సూచించారు. శాంతిభద్రతల పరిరక్షణతోపాటు నేర నియంత్రణ, ఛేదన, కేసుల దర్యాప్తు, కోర్టు కేసుల్లో శిక్షల శాతాన్ని పెంచడంపై అధికారులు నిరంతరం దృష్టి సారించాలన్నారు. సాంకేతిక పరిజ్ఞానాన్ని సమర్థంగా వినియోగిస్తూ శాస్త్రీయ దర్యాప్తు విధానాలను అవలంబించి ప్రజలకు మెరుగైన పోలీసు సేవలు అందించేలా సమన్వయంతో పనిచేయాలని శరత్ చంద్ర పవార్ సూచించారు.

ఈ సమావేశంలో అదనపు ఎస్పీ రమేష్, డీఎస్పీలు మల్లారెడ్డి, శ్రీనివాస్‌రావు, రవికుమార్, లక్ష్మీనారాయణతోపాటు సీఐలు, ఎస్‌ఐలు, ఇతర పోలీసు అధికారులు పాల్గొన్నారు.