కేంద్ర సిల్క్ బోర్డు 75 వసంతాలు పూర్తి చేసుకున్న సందర్భంగా, మల్బరీ సాగు విస్తీర్ణాన్ని పెంచేందుకు చేపట్టిన "మేరా రేషమ్ – మేరా అభిమాన్ 2.0 (నా పట్టు – నా అభిమానం)" కార్యక్రమంలో భాగంగా బుధవారం డోర్నకల్ మండలం బూరుగుపాడు గ్రామంలో క్షేత్ర పర్యటన నిర్వహించారు.
సెరికల్చర్ శాఖ జాయింట్ డైరెక్టర్ జి. అనసూయ, కర్ణాటక (మైసూర్) కేంద్ర సిల్క్ బోర్డు శాస్త్రవేత్త జె. శ్రీకాంత్ నాయక్ స్థానిక రైతు నందిగామ రామిరెడ్డి మల్బరీ తోటను పరిశీలించి, రైతులతో ముఖాముఖి నిర్వహించారు.
అధిక ఆదాయం: సాంప్రదాయ పంటలైన వరి, పత్తి, మిరప, మొక్కజొన్నలకు బదులుగా పంట మార్పిడి పద్ధతిలో మల్బరీ సాగు చేపడితే ఎకరానికి ఏటా రూ. 2 లక్షల వరకు నికర ఆదాయం పొందవచ్చు.
ఏడాదికి 5-6 పంటలు: ఒకసారి నాటితే ఏడాదికి 5 నుంచి 6 సార్లు దిగుబడి తీసుకోవచ్చు. తక్కువ పెట్టుబడి – ఎక్కువ రక్షణ: ఈ పంటకు పురుగు మందుల అవసరం ఉండదు, రసాయన ఎరువుల వాడకం చాలా తక్కువ. కోతులు, దొంగల బెడద అస్సలు ఉండదు.
సామూహిక సాగు లక్ష్యం: ప్రతి గ్రామంలో క్లస్టర్ స్థాయిలో కనీసం 50 ఎకరాల్లో మల్బరీ సాగు విస్తరించేలా ప్రణాళికలు రూపొందిస్తున్నారు.
శాస్త్రీయ పరిష్కారాలు: రైతులు ఎదుర్కొంటున్న వేరుకుళ్ళు తదితర సమస్యలకు మైసూర్ శాస్త్రవేత్త శ్రీకాంత్ నాయక్ శాస్త్రీయ నివారణోపాయాలను వివరించారు.
శాస్త్రీయ యాజమాన్య పద్ధతులు, ఆధునిక సాంకేతికతను పాటిస్తే తక్కువ శ్రమతో స్థిరమైన ఆదాయం పొందవచ్చని, గ్రామీణ యువతకు స్థానికంగానే ఉపాధి లభిస్తుందని అధికారులు పేర్కొన్నారు.
ఈ కార్యక్రమంలో సహాయ పట్టు పరిశ్రమ అధికారి కె. సురేష్, స్థానిక రైతులు, పట్టు పరిశ్రమ శాఖ సిబ్బంది పాల్గొన్నారు.
Click Save / Download PDF, then select Save as PDF in the browser print window.