రేగొండలో 444.75 క్వింటాళ్ల పీడీఎస్ బియ్యం స్వాధీనం

విశ్వసనీయ సమాచారం మేరకు, ఆగష్టు 18వ తేదీ సాయంత్రం సుమారు 7:00 గంటల సమయంలో సివిల్ సప్లైస్ ఇన్‌స్పెక్టర్ రాజు రేగొండ మండలంలోని పాత రైస్ మిల్ గోడౌన్‌లో ఆకస్మిక తనిఖీ నిర్వహించారు. ఈ తనిఖీలో పెద్ద మొత్తంలో పీడీఎస్ బియ్యం బస్తాలు లభ్యమవడంతో వెంటనే డీఎం (DM), డీఎస్‌వో (DSO) కీ సమాచారం అందించారు. వారు స్థలాన్ని పరిశీలించి, అది పీడీఎస్ బియ్యమేనని ప్రాథమికంగా నిర్ధారించారు.
అనంతరం, ఆగష్టు 19వ తేదీ ఉదయం 7:00 గంటలకు అధికారులు పంచనామా నిర్వహించి బియ్యం బస్తాలను తూకం వేయగా, మొత్తం 444.75 క్వింటాళ్ల బియ్యం ఉన్నట్లు తేలింది. స్వాధీనం చేసుకున్న బియ్యాన్ని ఉన్నతాధికారుల ఆదేశాల మేరకు భద్రత నిమిత్తం మారుతి ఇండస్ట్రీస్ రైస్ మిల్‌లో ఉంచారు.

ఈ దాడులను సివిల్ సప్లైస్ మరియు రెవెన్యూ శాఖల అధికారులు సంయుక్తంగా నిర్వహించారు. ఈ ప్రక్రియలో సివిల్ సప్లై ఇన్స్పెక్టర్, టెక్నికల్ అసిస్టెంట్ రాహుల్, డీసీఎస్ఓ, డీఎం సివిల్ సప్లై మరియు రేగొండ ఆర్.ఐ పాల్గొన్నారు.
ఈ ఘటనలో వాహన యజమాని కమ్ డ్రైవర్ తూర్పాటి శ్రీనివాస్, సాంబశివుడు మరియు పాత రైస్ మిల్ గోదాం యజమాని శ్రీనివాస్‌ల ప్రమేయం ఉన్నట్లు అధికారులు తెలిపారు. ప్రభుత్వ పీడీఎస్ బియ్యాన్ని అక్రమంగా నిల్వ చేయడం, రవాణా చేయడం లేదా దారి మళ్లించడం చట్టరీత్యా తీవ్రమైన నేరమని స్పష్టం చేశారు. ఈ వ్యవహారంపై ఎసెన్షియల్ కమోడిటీస్ యాక్ట్ (Essential Commodities Act, 1955) మరియు వర్తించే పీడీఎస్ నియంత్రణ నిబంధనల ప్రకారం చట్టపరమైన చర్యలు చేపట్టనున్నట్లు అధికారులు వెల్లడించారు.